Ni 82 hnua positivity rate hniam ber ní

March 16, Nilaini khan Mizoramah Covid-19 vei mi 239 hmuh chhuah niin, positivity rate 6.24% a ni a, ni 82 hnua positivity rate a hniam ber ní a ni. Nimin khan hripui vei dam tawh mi 481 chhuahtir an ni a, Covid-19 vangin mi pahnih an thi.

Covid-19 vei Nilainia hmuh tharte chu mipa 104 leh hmeichhia 135 an ni a; RT-PCR laboratory-a hmuh chhuah pali, TrueNAT hmanga hmuh 14, RAT hmanga hmuh 220 leh FIA hmanga hmuh pakhat an ni.

March 16-a Covid-19 positivity rate 6.24% chu ni 82 hnua positivity rate a hniam ber ṭum a ni a, December 23, 2021 khan 5.64% a lo ni tawh. Ni 66 hnua positivity rate 10% aia a hniam vawi khatna a ni bawk a; a hmaa positivity rate 10% aia a hniam a nih hnuhnung ber chu January 6 kha niin, 9.72% a ni.

Nimin khan hripui vei dam tawh mi 481 chhuahtir an ni a; district tina chhuak zat chu - Aizawlah mi 92, Khawzawlah 91, Mamitah 90, Saitualah 68, Lungleiah 43, Serchhipah 41, Hnahthialah 25, Champhaiah 11, Kolasib-ah 10, Siahaah paruk leh Lawngtlaiah mi pali an ni.

IDSP record angin, Mizoramah Covid-19 vei 2,21,977 hmuh chhuah a ni tawh a, mipa 1,03,583 leh hmeichhia 1,18,394 an ni a, mipa aiin hmeichhia 14,811-in an tam zawk. Nimin tlai dar 5 thleng khan mi 2,19,296 (98.79%) chhuahtir an ni tawh a, mi 674 (0.30%) thi tawhin, enkawl mek mi 2,005 (0.91%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,21,977 chu mi 1,000 zelah hripui vei mi 202 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.

Mizoramah March 16, 2022 thlenga swab sample endik tawh 18,77,031 aṭanga positivity rate chu 11.83% a ni a; RT-PCR hmanga endik zat percentage chu 19.83 a ni a, RAT hmanga endik zat chu 74.53% a tling.