BJP-te'n an thil tum hlawhtlinna atan MNF party hman an tum - Rahul Gandhi

All India Congress Committee (AICC) president Rahul Gandhi chuan nimin khan lehlángin Mizoram a rawn tlawh a; a Mualpuia vantlang inkhawmah thu sawiin, BJP leh RSS-te'n India ramah nun dan phung, ṭawng leh sakhaw hrang hrang awmtir an duh lo tih a sawi a, "He an thil tum tihhlawhtlinna atan BJP-te hian Mizoramah chuan MNF party hman an tum a ni," a ti.

3rd. MAP Ground, Mualpuia rally-ah thu sawiin Rahul Gandhi chuan, "Tunah hian India ram kal zel dan turah thil pahnih a insual mek. BJP-RSS te chuan India ramah hian nun dan, kalphung, ṭawng leh sakhaw hrang hrang awm hi an duh lo a, Congress chuan India mi zawng zawng, state hrang hranga chengte ṭawng, sakhua leh nun dan phung humhimsak kan duh thung," a ti a; Congress chuan Mizote sakhua, nunphung leh ṭawngte a humhimsak zel dawn thu a sawi.

Mizoramah chu state tereuh tê a nih thu sawiin Rahul-a chuan, "State tête pawhin an sakhua, nunphung leh ṭawngte humhim turin dikna an nei. BJP leh MNF an thawkho hi pawi ka ti a, MNF hian Mizoramah BJP kawng an hawnsak a ni. BJP-te'n MNF-te hi an thil tum tihhlawhtlinna atan hman an tum. BJP RSS-te hi kan bei ang a, kan hneh dawn. Mizo mipuite in hma lam hun hi mi dangin an ngaihtuahsak dawn lo che u, inthlan hmangin nangmahni ngeiin in hmakhua tur in rêl dawn," a ti.

AICC President chuan, kum 2019 inthlanah BJP thuneihna paihthlaksak a ni dawn tih sawiin, "BJP-te hi khawiah pawh inrawlh an tum. An thil tum tihhlawhtlinna atan Planning Commission, zirna, Governor, etc.-ah an duhzawng ti thei tur an dah mai. BJP-in Mizo mipui hma lam hun tihchhiatsak a tum hi kan phal lo. MNF kaltlangin Mizoram hi BJP pe suh u," a ti a; RSS duh záwng leh thil tumte pawmpuitu chu mithiam a nih loh pawhin dinhmun sang tak an chelhtir fo thu a sawi bawk.

Rahul Gandhi chuan, BJP-te'n sum an ngah tih mi zawng zawngin an hre vek tih sawiin, "National media lamah an lan chuai chuaina pawh hi an eiruk sum an hman vang a ni. Mizorama an lo luhna pawh hi an eirûk sum a ni," a ti.

Kum 1987-a Mizoramin remna leh muanna a neih tirhah a pa nen Mizoram an tlawh tih sawiin Rahul-a chuan, "Ka pa khan Mizo mipuite'n remna leh muanna an neih theihna atan hmalak a tiam a ni. Mizoram a rálmuang a, hmasawnna a hmu zel hi a lawmawm. Per capita income-ah sorkar laipui aiin a let 20-in Mizoram hi a sang zawk a ni," a ti a; Mizorama tlawmngai pawl, zirlai pawl leh kohhran hnathawhte lawmawm a tih thu a sawi.

Rahul Gandhi chuan, Mizoram sorkar hmalakna fakin, "Narendra Modi kaihhruai sorkarin a thlâwp duh lo chungin Mizoramin hmasawnna kawng a zawh a. Modi sorkar aia sang zawkin in ṭhang a, hei hi NLUP leh NEDP kalpui vang a ni. BJP chuan lo neitute ram a chhuhsak laiin, Mizoram sorkar chuan lo neitute ram a pe a ni," a ti.

Congress an sorkar leh chuan Mizoram chu khawvel ram dangte nen an thlunzawm dawn tih sawiin Rahul-a chuan, "Mumbai khu western gateway a ni a, Mizoram hi eastern gateway-ah siam kan tum. Ṭhalai 11,000 tan hnathawh tur kan siam ang a, Mizoram hi khualzin mite hmunpui a ni ang," a ti a; chutiang tur chuan Mizo mipuite ṭawng, nunphung leh sakhua humhalh a ngaih thu a sawi.

AICC President chuan, Mizoram leh hmarchhak state-te chu an chhungkua nen inlaichinna an neih thu sawiin, "Hei hi politics-a inlaichinna a ni lo a, thinlung taka inlaichinna a ni. Mizo hian aiawhtu Delhi-ah in nei a, Delhi-a Mizote aiawhinRahul Gandhi a ding zel ang. Harsatna in neih chuan rawn thlen rawh u, in tan ka inhawng reng a, puih theihna ka neih che u chuan ka pui ang che u," a ti.

Mizote'n infiamna lama hlawhtlinna an chang chu a lawmpui a tih thu sawiin Rahul Gandhi chuan, "Infiamna lamah hian Mizote hian India ram in tihmingṭha hle. Youth Olympic gold medal latu zingah Mizo tlangval Jeremy Lalrinnunga a tel kha a ropui hle a ni," a ti a; Mizo ṭhalaite'n tun aia nasain infiamnaah India ram an la tihming-
ṭha theia a hriat thu a sawi.