Lunglei NGO-te High Court-ah kal an tum

Election Commission of India-in Mizoram aṭanga Bru raltlan, Tripura-a awm mekte zinga mi 203, hearing mumal nei loa Mizoram electoral roll-a an thun duh loh lantir nan November 19, Thawhṭanni khan Lunglei DC leh district election officer pisa tualah electoral roll copy hâl a; Gauhati High Court-ah PIL thehluh an tum.

Electoral roll thar, Bru mi 203-te chuanna hâlna inkhawm hi NGO Coor­dination Committee secretary Ngur­than­sanga Sailo-in a kaihruai a; joint secretary Eric Zomuanpuia chuan, electoral roll-a Bru pakhat thun a nihin Mizo pakhat vaw thlu zel ang an nih thu sawiin, tunah Bru mi 203 lai thun an ni chu Mizo hnam tan tawrhna nasa tak a nih thu a sawi.

Bru mi 203-te electoral roll-a thun belhna hi Second Supplementary Electoral Roll tih a ni a, Bru-te chu Bru Repatriation and Identification Slip hmanga thun a ni. Dan loa Bru thun an duh lohzia lantir nan electoral roll thar chu Joint NGO-a tel pawl aiawhte'n an hâl a ni.

Lunglei NGO Coordination Committee chuan dan loa electoral roll-a Bru mi 203-te thun chungchangah hian Gauhati High Court, Mizoram Bench-ah public interest litigation (PIL) thehluh an tum. PIL hi nimin khan an ukil B Lalramenga hoin an thehluh hman beisei a ni a, an thehlut hman lo a nih pawhin vawiinah an thehluh beisei a ni. Joint NGO chuan, a hmalakna zel turah lungrual taka ṭang tlang zel turin mipui an ngen bawk.