CEO-in Bru tana PS siam mek a enfiah
Mizoram chief electoral officer (CEO) Ashish Kundra chuan nimin khan Mamit district-a Tripura dep khua, Kanhmun a tlawh a, Tripura-a awm mek Mizoram Bru-te vote thlakna tur, temporary polling station 15 siam mekte a enfiah.
Ashish Kundra hian Bru-te tana Mizoram MLA inthlanpuia temporary polling station sak mekte a enfiah bakah, venhimna lama ruahmannate a enfiah a; Kanhmun Tourist Lodge-ah Mamit DC, North Tripura District Magistrate, North Tripura SP leh Kanhmun khawtlang hruaitute, zirlai pawl aiawh leh kohhran hruaitute nen inkâwmho bawk.
CEO chuan, Kanhmun khawtlang hruaitute chu inthlanpui tluang taka a kal theih nan thawhpuiah sáwmin, Kanhmun NGO-te mawhphurhna a sâng thu a sawi a; tluang taka inthlan a nih theih nan theihtawp chhuaha ṭan la turin a ngen a; vote thlak turte tan voter slip chu inthlan ní hma ni thumah pek chhuah vek ni se a duh thu a sawi.
Kanhmun khawtlang hruaitutete chuan, Mizorama vote thlak tura kal Bru-te chu thinlung taka an lo lawm tur thu leh, anmahni lo lawm nan Mizoram chinah welcome gate siam an tum thu an sawi a ni.
Inkawmhona ruahmanna an siam dan chuan, Bru-te chu an camp aṭangin motor-in Tripura ramri thleng an kal ang a, chuta ṭang chuan ke-in vote an thlakna tur polling station an pan ang.
Tripura-a Bru camp parukah Mizoram khua leh tui, district pathuma Assembly constituency pakuaa vote nei mi 11,968 an awm mek a; Mizoram chhung-ah ngei vote an thlak theih nan Kanhmun khuaah temporary polling station sak mek a ni.
Kanhmun khelmualah Mamit district-a constituency pathum - Hachhek, Dampa leh Mamit biala mite tan polling station pakua siam a ni a; Kanhmun indoor stadium-ah Kolasib district leh Lunglei district-a constituency-te tan polling station pathum ve ve ruahman a ni. khelmual leh indoor stadium velah hian central armed police (CAPF) company pahnih (mi 200 vel) leh state police mi 30 vel duty tur a ruahman a ni bawk.
CEO Ashish Kundra leh official dangte chuan nimin vek khan Tripura-a Naisingpara camp an tlawh bawk a; IGP Neeraj Thakur, additional CEO Krishna Mohan Uppu leh deputy CEO H Lianzela, Mamit district-a election hotute'n an ṭawiawm a ni.