Kum 10 Congress an sorkar chhungin hmasawnna lian an thlen lo - Dr Thangtea

MNF vice president Dr R Lalthang­liana, South Tuipui biala MNF candidate chuan, Congress party-in kum 10 sorkar an chelh chhungin Mizoramah hmasawnna lian an thlen lo nia sawiin, pawi a tih thu a sawi a, "Pathian leh mipui zarah MNF-in thuneihna kan chan chuan kan SEDP hmangin Zoram mamawh hmasawnna kan thlen dawn a ni," a ti.

Dr R Lalthangliana hian nimin khan North Vanlaiphaia vantlang inkhawmah thu sawiin, "Congress sorkarin Hindi zirtirtu 1,305 an lak an bàn leh vek mangang takte hi Mizoram sorkara an luh theihna tura hmalakna hmuh mumal tur awm lo hi pawi ka ti tak zet a, thuneihna kan chan chuan Hindi zirtirtu bàn takte chinfel dan kan ngaihtuah dawn a ni," a ti a; MNF sorkarah chuan CSS Hindi zirtirtu 400 chuang an lakte chu an contract a tawp hmain sorkarah a ngheta an luh theih dan tur an ngaihtuah lâwk vek niin a sawi.

MNF Vice President chuan, MNF sorkar laiin ram tan thil tam tak an tih laiin, mipui rilru leh thinlung tihnat an neih a rin thu sawiin, "Thinlung takin MNF party chuan ngaihdam kan dil a ni," a ti.

Hrangturzo biala MNF candidate Lal­chamliana pawhin thu sawiin, Hrangturzo bialah MNF-in sàn lam an pan zel niin a sawi a, "Pathian malsawmna dawng kan nih avangin tumah chapo tur kan awm lo," a ti a; mi dangte MNF-a an luh zel theih nan theihtawp an chhuah a ṭul thu a sawi.