Law & Judicial department hnuaiah cheng nuai 143 a bo - MNF Legal Board

MNF Legal Board hotute chuan nimin khan Aizawl Press Club-ah thuthar thehdarhtute an kâwm a; Law & Judicial department-ah cheng nuai 143 a bo a, thubuai a awm mek thu leh, Lokayukta dinna tura Mizoram sorkarin kum thum chhunga cheng nuai 478.02 a dah chu a awmna sawifiah tura sorkar an phût thu an puang.

MNF Legal Board secretary Lal­remtluanga chuan, Mizoram sorkarin Lokayukta-a thawktu tur peon pakhat pawh a la lak hmain cheng nuai 478.02, kum thu chhung­a budget-a dah chu sawifiah an phût tih sawiin, "A changtu Law & Finance Minister hian a fanghmano ei nge, khawi atan nge an hman tih hi tun inthlan hma ngeia Mizo mipui hnena hrilhfiah ngei turin kan phût tlat a ni," a ti a; a sawifiah thei lo a nih chuan inthlan chuh ve tlak a nih loh avangin a báwm khâr tura an ngen thu a sawi.

Lalremtluanga sawi danin, Congress kaihhruai Mizoram sorkarin The Mizoram Lokayukta Act 2014 pass in, a hmingin Lokayukta an din a; Lokayukta atan chuan Law & Judicial department-ah kum 2016-17, 2017-18 leh 2018-19 ahte budget-ah cheng nuai 159.34 ṭheuh dah a ni a, chu chu belhkhawmin nuai 478.02 a ni. Budget-a dah a nih dan chu Demand for the Grants 2016-17 phek 22-na, Demand for the Grants 2017-18 phek 23-na leh Demand for the Grants 2018-19 phek 22-naah a chuang.

Danah chuan state-a Lokayukta chairman hlawh chu High Court-a chief justice hlawh aia tlem lo leh member hlawh pawh High Court-a judge hlawh aia tlem lo tur a ni a; Govt. of Mizoram Statement on Salary & Employment Data 2017-18 tarlan danah erawh chuan, Mizoram Lokayukta chairman hlawh tura tih chu thla khatah Rs. 90,000 (fixed) leh member hlawh tur Rs. 80,000 (fixed) chauh a ni thung.

Lalremtluanga chuan, CM Lal Thanhawla'n a kaihhruai sorkar chu eptute'n eiruknaah puhna tur an hre lo anga a sawi ṭhin chu mak an tih thu sawiin, "Tun sorkar anga mipui sum rawk tamna sorkar hi awmin kan hre lo. Law & Judicial department kuta sorkar pawisa awm pawh a him tawh lo," a ti a; cheng nuai 143 tihchingpen a nih thu a sawi.

Law & Judicial department-ah cheng nuai 143 a chingpena hriat a nih avangin Court case a awm mek tih sawiin Lalremtluanga chuan, "A mawhphurtu ber Law Minister-in a hmai phih fai nan em ni, MR pakhat a bàntir nia thuthang awm hi a dik leh dik loh min hrilh turin Law Minister kan phût. Inthlan hma ngeia Mizo mipuite hnena heng sum bo chungchang hi sawifiah ngei turin kan phût a ni," a ti.

MNF Legal Board Secretary chuan, MNF-in sorkarna an chan chuan mipui tan an chhiah pek chu phurtir a nih avangin a zâng thei ang bera chhâwk zângkhai an tum thu a sawi a, "Mizoram Revenue Rules 2013 Rule 47 Sub-rule 4 hnuai­a ram, house pass, stall pass, shop pass, periodic patta, land lease-te sorkarin a acquire a, ram neitute zangnadawmna lak tur aṭanga 15% Revenue department-a chhûn luh ngai ṭhin hi ennawn a ni ang," a ti a; Mizoram Land (Acquisition, Rehabilitation and Resettlement) Act 2016 hnuaia solatium pek dan pawh ennawn an tum thu a sawi.

Lalremtluanga chuan, MNFin sorkarna an chan hunah Lokayukta chu tihpuitlin leh a taka kalpui nghal an tum thu leh, Prosecution Directorate pawh danin a phût ang thlapa siam an tum thu a sawi bawk.