Larsapin Motherless Babies Home a tlawh

Governor Kummanam Rajasekharan chuan nimin khan Tuikuala Salvation Army enkawl Motherless Babies Home a tlawh a; hnuchham, fahrah leh riangvaite enkawl hna chu thil ropui tak a nih thu a sawi.

Larsap chuan, hnuchham, fahrah leh riangvaite enkawl chu khawtlang, mahni mihringpui leh Pathian rawngbawlna a nih thu sawiin, "Hnuchham enkawlna kawngah kei pawh ka thawkte tawh ṭhin a. Mizoram hmun dangah nu leh pa enkawltu nei lote enkawlna hmun dangte pawh eng emaw zat a awm tih ka hria a, a tahtawla tlawh zel ka tum," a ti a; an rawngbawlna kawngah ṭanpui theihna a nei a nih chuan a inhawn reng thu home enkawltute a hrilh.

Hnuchham enkawlna an din dan sawiin Commissioner Lalzamlova chuan, "Kulikawnah kum 1940 khan Salvation Officer ṭhutkhawmnaah officer pakhatin nausen pianghlim, a hringtu nuin a thihsan chungchang a sawi chhuak a, mi dangin an thil hriatte lo sawi ve zelin, officer-te chuan an hlawh aṭanga pawisa thawhkhawma bul ṭan an remti tlang a; chuta ṭang chuan hnuchham enkawl hna kan thawk ṭan a ni. Kum 1952-ah hnuchham enkawlna hi mumal zawka din leh enkawl ṭan a ni," a ti.