ZPM-in Aizawl PS-ah FIR an thehlut

Zoram Prople’s Movement (ZPM) chief ministerial candidate Lalduhoma chungchanga MNF party-in Lalduhoma thlalak leh BJP symbol-te nen BJP leh ZPM thawkho anga dâwt phuahchawp tarlanna booklet, copy 1,00,000 an siam an thehdarh avangin ZPM general secretary James Lalnuntluanga chuan nimin khan Aizawl Police Station-ah FIR a thehlut.

MNF-in booklet an siam hi a buatsaihtu chu 'Media, Publicity & IT Monitoring Cell, MNF Geneneral Headquarters, Aizawl, Mizoram' tih a ni a; November 19, Thawhṭanni aṭang khan Lalduhoma dinna bial pahnih - Serchhip leh Aizawl West-I chhungah sem darh a ni.

ZPM thuchhuah chuan, Kristian ramah dâwt thu bawlhhlawh leh politics rimchhe tak hmanga Kristiante inkara inbeihna a awm chu pawi an ti a, ringtute tih âwma an ngaih loh thu a tarlang a, "Hetiang thil titute hian ram siamṭhatna atan a ngaihna an hriat tawh loh avang leh mipuiin an hnâwl mek nia an inhriat avangin an mangang tak zet a, kalphung thar leh mipui sorkar siam tumtu ZPM CM candidate leh ZPM candidate-te hi dâwt leh thu dik lo hmanga bei tawh lo turin kan duh a ni," a ti.

ZPM chuan, NGO Coordination Committee ngenna ngai pawimawhin ZPM chuan Chakma mi candidate-ah a siam lo tih sawiin, "Inthlan hma leh inthlan hnuah BJP kan thawhpui dawn loh thu NGO Coordination Committee hruaitute hnenah chiang takin kan lo sawi tawh bawk," an ti a; chutih laiin, Congress leh MNF-te chuan Chakma candidate an neih avangin BJP-te nen an danglam lo tih an sawi bawk.