KHAWTHLIR

Thisen pe
Border Security Force (BSF) 90th. Battalion, Sakawrtuichhuna awmte chuan BSF din champha vawi 53-na pualin nimin khan blood donation camp an huaihawt a, Aizawl Civil Hospital tan thisen unit 29 an pe.

DC-in khap
Aizawl DC chuan khapna thupek chhuahin, Aizawl district chhunga luia sangha fuante tihbuai phal a ni lo tih a puang a, "Man emaw, tihlum emaw tur a ni lo. He thupek zâwm lo chu The Mizoram Fisheries Act 2002 Section 5 hmanga hrem theih an ni," a ti.

Mamitah zu man
Mamita Excise & Narcotics department leh Mamit Venghlun Branch YMA Kumpuan Sub-Committee member-te chuan nimin khan Tudai ramhnuaiah sap zu (IMFL) ûm puitling 24 leh ûm chanve 96 an man. Zu hi khawlai rate ang chuan Rs. 46,000 man a ni a; ramhnuaia man a nih avangin a neitu rinhlelh man an la nei lo.

Oil & gas zawng leh
Oil India Limited (OIL) chuan Mizoram chhunga tuialhthei leh boruak alh thei (oil & gas) zawn hna an chhunzawm leh tawh a, November 15, 2018 khan Phulmawi khaw dai (Tlungvel bul)-ah lei verh hna (drilling operation) an ṭan leh tawh. Lei verh hna hi Quippo Oil & Gas Infrastructure Ltd.-in an thawk a; OIL hotute chuan, lei chu metre 4,000m (km. 4) vela thûk verh an tum thu leh, oil & gas a awm ngei theihna hmuna an ngaih thu an sawi.