ZPM complaint thehluh bawhzuiin CEO-in insawifiah turin MNF party a hriattir

Media, Publicity & IT Monitoring Cell, MNF Geneneral Headquarters, Aizawl, Mizoram-in booklet copy 1,00,000 siam a, Mizoram hmun hrang hranga an thehdarh chungchangah Zoram Prople’s Movement (ZPM) Steering Committee vice chairman Dr Kenneth Chawngliana chuan nimin khan Chief Electoral Officer (CEO)-ah complaint a thehlut. CEO-in MNF show cause notice a pe.

ZPM tarlan danin, MNF-in booklet/pamphlet an siamah hian ZPM chief ministerial candidate Lal­duh­oma chungchang leh a thlalakte an tarlang a, ZPM chu BJP nena thawkho tur angtein an ziak bawk.

MNF thu tihchhuah chu dâwt chiang tak a ni tiin ZPM hotute chuan CEO-ah complaint an thehlut a; November 20, Thawhlehni khan an general secretary James Lalnuntluanga'n Aizawl Police Station-ah FIR a lo thehlut tawh bawk. Complaint an thehluhah hian ZPM hotute chuan Chief Electoral Officer chu a rang thei ang bera hma la turin an ngen a ni.

Nimina State Media Centre, Secretariat Annexe-a political party tin aiawhte a kawmnaah CEO Ashish Kundra chuan, MNF party-te chu party dang chanchin chuanna booklet/pamphlet an sem chu hnûk­dâwk turin a hrilh a; MNF thil tih dan chu Election depart­ment-in a ngaimawh hle thu leh, danin a phût anga hmalak a ngaih tur thu a sawi.

ZPM hruaitute chuan Election hotute chu inthlana candidate zinga criminal case nei tawh leh nei mekte'n mipui hriatah an thubuaite chanchin kimchang an puangzar tur a ni tih chung­chang an sawi lang bawk a; hun a teptêr tawh hle chungin, candidate-te case neih chungchang media-a hmuh tur a la awm loh avangin, case neite'n an puanzar ngei theih nana hma la turin an ngen a ni.

Hemi chungchangah hian CEO chuan nimina politi­cal party hotute a kawmnaah, Election Com­mission of India-in phût angin, candidate tu pawh crimi­nal case nei tawh leh nei mekte'n chanchinbu leh TV hmangin mipui hriatah an puanzar ngei a ngaih thu a sawi a, "Heng zawng zawng hi campaign tawp ní, November 26 tlai dar 4 hma ngeiin tihfel/zawm ngei tur a ni," a ti.

Hetihlai hian sorkar thu­chhuah chuan nimin tlai khan MNF Media Cell hnenah CEO-in show cause notice pein, lehkha an dawn aṭanga darkar 24 chhunga insawifiah tura a hriattir thu a tarlang.

Sorkar thuchhuah tarlan danin, ZPM-te complaint uluk taka ngaihtuah a nih hnuah MNF-te thil tih dan chu Representation of Peoples Act, 1951 Section 123 (3A) leh Section 125 kalh thil anih avangin CEO chuan MNF Media Cell chu dan anga insawifiah turin nimin tlai khan show cause notice a pe a, insawifiahna hun atan hian lehkha dawn atanga darkar 24 chhung hun a pe a ni.