Electoral roll-a Bru thun vangin NGO-in PIL thehlut

Election Commis­sion of India-in Mizo­ram aṭanga Bru raltlan, Tripura-a awm mekte zinga mi 203, hearing mumal nei loa Mizoram electoral roll-a thun chu dan loa thil tih nia ngaiin Lunglei NGO Coordination Com­mittee chuan an ukil kaltlangin nimin khan Gauhati High Court, Aizawl Bench-ah pub­lic interest litigation (PIL) an thehlut.

Thu dawn danin, Tri­pura relief camp-a awm mek Bru mi 203-te chu Lunglei district-a elec­toral roll-ah thun belh a ni a, chu chu Second Supplementary Electoral Roll tih a ni. Bru-te electoral roll-a thun tura finfiahna atan Bru Re­patriation and Iden­tifi­cation Slip hman a ni.

Hetih lai hian, Home secretary chhuak ta Lal­nunmawia Chuau­ngo chuan, Bru Repatriation and Iden­tification Slip chu Bru-te Mizorama hruai kirna atan chauha tih a ni a, thil dang atan hman a remchan loh thu, Mizoram chief electoral officer (CEO) hmasa SB Shashank-a a lo hriattir tawh a ni.

Lunglei district elec­toral roll-a Mizo­ram páwna awm mek Bru mi 203 thun belh a nih vanga an lungawi lohzia lantir nan Lunglei NGO Coordination Committee chuan No­vember 19, 2018 khan Lunglei DC leh District Election Officer pisa tualah electoral roll copy an hâl a ni.