Bru-te vote thlâk dan tur sawifiah Polling station 15 siam a ni dawn

Chief electoral officer (CEO) Ashish Kundra chuan nimin khan State Media Centre, Secre­tariat Annexe-I ah political party-te kâwm a; Tripura relief camp-a awm Mizoram Bru-te'n Kanhmuna vote an thlak dan tur a hrilhfiah. Tripura-a Bru-te tan Kanhmunah polling station 15 siam a ni dawn a, siam mek niin, CEO hian November 20 khan a hmunah a enfiah a ni.

Ashish Kundra chuan, Kanhmun khuaa Tripura-a Bru-te tana polling station siam mek chu a hmunah a tlawh tih sawiin, "Kanhmun mipuite'n sorkar hmalaknate lawm taka thláwpin, polling station sak hnaah pawh YMA-te'n an pui mek. Tripura-a Bru camp-te pawh kan tlawh a, inthlan ní-ah Kanhmunah an tan polling station tur sorkarin a buatsaihah ngei vote rawn thlak turin ka chah a ni," a ti.

Mizoram CEO sawi danin, Kanhmun YMA khelmualah Tripura-a Bru, Mamit district-a vote neite tan polling station pakua siam a ni dawn a; Lunglei leh Kolasib district-a vote neite tan Kanhmun Indoor Stadium-ah polling station pathum ve ve siam a ni dawn. Bru tana polling station siamah hian zing dar 7 aṭanga tlai dar 3 thleng vote thlak hun hawn a ni ang.

Polling station-a duty turte chu Lunglei, Mamit leh Kolasib district aṭanga chah chhuah a ni dawn a; Kanhmun khuaa cheng mekte tan chuan ṭum dang ang bawkin sorkar sikula polling station siamah vote thlak tur a ni.

Inthlan hun chu chawlhkar khat vel chauhin a dang tawh tih sawiin CEO chuan, "A hun dik takah Mizoram mipuiin vote an thlak theihna turin sorkarin theihtawp a chhuah a, political party-te pawhin an thlàwp ṭhat a pawimawh. Tuna state chhunga ruling party ni mekin sorkar hnathawkte, sorkar hmun leh hmanrua engmah an advantage tan hman phal a ni bik lo tih an hriat a ngai," a ti.

Ashish Kundrar chuan, MNF party-te chu party dang chanchin chuan­na pamphlet an sem chu hnûk­dâwk turin a hrilh a, "Hei hi Election department lam chuan a ngaimawh hle a ni," a ti a; danin a phût anga hmalak a ngaih tur thu a sawi.

Election Commission of India-in phût angin, candidate tu pawh criminal case lo nei tawh leh nei mekte chuan chanchinbu leh TV hmangin mipui hriatah an puangzar ngei ngei tur a nih thu sawiin Ashish Kumar chuan, "Heng zawng zawng hi campaign tawp ní, November 26 tlai dar 4 hma ngeiin tihfel/zawm ngei tur a ni," a ti.