Ram siamṭhatna kawngah kohhran an harh thar mek - Lalduhoma

ZPM chief ministerial candidate Lal­duhoma chuan nimin khan Vairengte Bazara vantlang inkhawmah thu sawiin, ram siam-ṭhatna kawngah kohhran zingah harh tharna a thleng mek a, chu chu ram tan báng loa ṭawngṭaitute ṭawngṭai rah chhuah a nih thu a sawi.

Lalduhoma chuan, Mizoramah zu avang­in chhungkaw nu ber an rûm a, an fa duh lai, an pasal hmangaihte a hun loah an thi fo tih sawiin, "Tun inthlanah nu ho zingah harhna a thleng mek a, kohhran zingah harh tharna a thleng mek bawk. Kohhran mite enkawl tawh turin kohhran zingah harh tharna a thleng mek a, heng zawng zawng hi kan ram tan báng loa ṭawngṭaitute ṭawng-ṭai rah a ni," a ti.

ZPM CM Candidate chuan, ramri chung­chang huai taka sawi thei party chu ZPM chauh a ni tih sawiin, "Hma la thei awmchhun chu keini chauh kan ni. Corruption sawi thei leh hma la ngam tur awm­chhun pawh kan ni. Tun inthlanah hian vote chhuah tur kan nei a, chu chu NGO a ni. Chakma tamna hmunah Chakma candidate nei lo turin NGO-in party tin min ngen a, a zâwm awmchhun chu ZPM chiah kan ni," a ti a; NGO zahawmna humhim turin an thu zâwmtu leh zâwm lotute an inbûk dawn tih a sawi.

Kohhranin sem policy an duh lo hle tih sawiin Lalduhoma chuan, "Sem policy hi kan Bible zirtirna kalh a ni a, mipuite hmangaihna aiin vote lei tumna a nih avang leh din­chhuahna tak tak a ni lo. Sem hi thil ṭha leh hlâwk chu ni se, khawvela sorkar hausa leh ropui tak takte hian an sem ṭhin ang," a ti.

Serlui biala ZPM candidate Lalmuanpuia Punte pawhin thu sawiin, "MNF leh Congress-te hian an sorkar laiin ramri chungchangah hma pakhatmah an la lo ve ve a ni," a ti a; hruaitu huaisen, ramri chung­changa hma la ngam Mizoramin a mamawh a, a chhanna chu ZPM CM Candidate a nih thu a sawi.