Hawla'n BJP chungchang a sawi

Mizoram Pradesh Congress Committee (MPCC) president Lal Thanhawla chuan nimin khan Tuichawng bial chhunga khaw lian ber Chawngte a tlawh a; Hindu lalna ram din tum BJP-in Mizoram khawthlang lama Bru leh chhim lama Chakma-te hmangin MLA neih an tum tih a sawi.

Lal Thanhawla chuan, BJP-te Mizorama an inzâr pharh dan leh inbenbel an tum dan sawiin, "Chakma mipuite bungrua ang maiin lei an tum a, politics hi kan khawsak dan leh kan nun thlenga min khawihtu a nih avangin, ngaihtuahna fím tak hmangin hetianga zah lo taka anmahni bungrua ang maia entu BJP hi kan hnâwl a ngai," a ti a; Congress party chu vote turin mipuite a sáwm.

MPCC President chuan, Mizorama Congress sorkar chhunga ram hmasawnna ruhrel pawimawhte sawiin, Sairang thlenga rel kawng siam mek a nih thu te, Tuirial Hydel Project hawn tâk te, State Referral Hospital tihpuitlin leh medical college dinte a sawi lang a; chu'ngte chu mipuiin Congress party sorkarna siam tura an vote ṭhin vang a nih thu a sawi.