MPCC President-in kum 2013 inthlanah tla turin min duh daih tawh - R Lalzirliana

Congress party-a hruai­tu hlui pahnih, tuna MNF candidate R Lal­zirliana leh Lalrinliana Sailo te chuan nimin khan Seling khuaa MNF campaign office-ah thuthar thehdarhtute an kâwm a; R Lalzirliana chuan, MPCC president Lal Thanhawla'n kum 2013 MLA inthlan­ah amah leh Lalrinliana Sailo-te chu tla se a duh daih tawh niin a sawi.

R Lalzirliana chuan, kum 2013 inthlan hma lawkin, John Siam­kunga'n district chung­changah MPCC President nen an inbiak rûkna a sawi chhuak tih sawiin, "MPCC President-in Khawzawl leh Saitual chu district atana âwm a tih loh thu leh Hnahthial chu district atana âwm a tih thu a sawi chhuak a. Khata ṭang daih tawh khan Pu Rina nen hian tla se min duh tawh tihna a ni," a ti.

Chief Minister-in Ṭawi biala thu a sawinaah, 'Zirliana leh Rinliana an tlak chuan eng pawh kan ti ang' tih a sawi thu a dawng tih sawiin R Lal­zirliana chuan, "Kan tlak theihna atan min bei nasa hle a, a chhe tinrêngin min bei a ni. Hengte avang hian khawngaihtu kan ngah phah. Kum 20 lai kan beih tawh MNF-te'n min lo dawnsawn dan a ropui hle," a ti a, MNF mi leh sate chu an rilru a zau a tih thu a sawi.

R Lalzirliana chuan, doctor dah phût vanga Champhaia buaina a awm ṭumin, Home Minister a nih angin Home department, Health department, YMA leh MPF hruaitute a koh khawm thu sawiin, "YMA leh MPF-te remna palai hna thawk turin ka ngen a, anni pawhin an hreh lo. Meeting zawhah Chief Minister-in Home Secretary a phone nghal a, buaina a rehna atan engmah ti lo turin a hrilh a ni," a ti.

R Lalzirliana chuan, Congress-in an party chanchinbu Congress Thlifimah Rev. Chanchinmawia thihna an tharthawh leh tih sawiin, "Sorkarna kan chanin, Home Minister ka nih angin hemi chungchang hi ka buaipui a, intihhmingchhiatna mai maia kan ngaih avangin chhui zui tlakah kan ngai lo," a ti a, Congress-te'n he thubuai hi an hre chiang duh a nih chuan khatih laia Aizawl SP, tuna an party candidate LT Hrangchal hi zawt chiang mai se a duh thu a sawi.

Lalrinliana Sailo chuan, inthlan dawnah a candidate-te bei loin a hmalak dan tur a sawi mai ṭhin tih sawiin, "Hetianga CM-in min ûm vak hi mak ka ti a, engmah ka ni lo a, ûm tlak pawh ka ni lo. Manipur-a Congress MLA a rawn tîr a, Manipur-a Meitei ze ṭha lo rawn ken luh a tum niin ka hria," a ti a; Congress chuan sum sem bak buaipui an neih loh thu a sawi.

MPF leh mipuite hre tura a duh tarlangin Lalrinliana Sailo chuan, "Pu Hawla'n ka tlâkna atan chuan tuifimin a daih lo pawhin, tui nu hman a tum thu a sawi a ni. Phuaibuanga kan local council chairman chu meeting-na aṭanga koh chhuah a ni a, a mobile phone-te laksak a ni. LC chairman ko chhuaktute hian silaite an chelek a, silai tak nge a lem a nih erawh ka hre lo," a ti.