MPCC-in dik taka politics khel turin an chah

Congress party chuan thuchhuah siamin, November 28-a Mizoram inthlanpui a hnai tulh tulh a, MNF leh ZPM-te chu BJP nena thawhho chungchangah nasa taka inpuhtawnin an inbei na sâwt hle niin an tarlang a; ZPM leh MNF-te chu dik leh felfai taka politics khel turin an chah.

MPCC thuchhuah chuan, MNF-in an pamphlet siamah Lalduhoma thlalak leh BJP symbol an dah dun avangin ZPM-in Aizawl Police Station-ah FIR an theh­lut tih sawiin, "Hetiang thlenga ZPM leh MNF-te inbeih a ngai ta hi pawi kan ti hle. Chuvangin, Congress party angin dik leh felfai taka politics khel ve ve turin ZPM leh MNF-te kan beisei a ni," a ti.

MNF-te'n an pamphlet-ah sakhaw hming ziak langin, sakhaw hrang hrang zuitute inkar­ah inngeih lohna tipunlun thei thil an chhuah tih sawiin MPCC chuan, "Hei hi Election Code of Conduct bawhchhiatna a ni. MNF-te pamphlet siama lang chiang tak chu, inthlan a hnai tulh tulh a, MNF-te beidawng hian hmanrua an duh chhe tulh tulh tih a hriat," an ti a; dâwt ngialngan hmang­a mipui chhiar tur an siam leh an sem darh chu MNF-te beidawnzia ti­chiangtu a nih thu an sawi.

Congress party chuan, Aizawl Municipal Corporation-a MNF sor­karin ram nasa takin a lei niin an sawi a, "Luangmualah house pass no. 739 of 210 sq. meter 1,650, Sihphirah V/C pass no. 5/99 2000 bigha 12, Ailawngah V/C pass no. 5.04.2009 sq.meter 16059.48, Luang­mualah periodic patta no. 1166/1976 leh no. 1166/C/76 an lei. Eng atana hman tur nge? Mipui tan nge an lei a, anmahni MNF party tan tih mipui hriatah puang turin kan phût a ni," an ti.

AMC sum chu mipui aṭanga khawn khawm a ni tih sawiin MPCC chuan, "Ṭul lo taka hman tur a ni lo a, chhiah petu mipuite hi zah hle tur a ni. Bawngkawn péngṭhuam laia MNF sorkarin ram a lei pawh mipui tan ni loin, an party tan an lo lei tawh a, hetiang hi thleng nawn tawh lo se kan duh," an ti a; AMC-in ram an leite chu MNF party mi induhsak nan leh sum siam nan an hmang leh a nih chuan MPCC-in a ṭul anga hma an lak dawn thu an sawi bawk.