Joint NGO-te’n Kolasib district Mipuiah thawhlawm khawn dawn

Kolasib All NGO Coordination Committee chu nimin khan SHYMA Committee Room-ah an ṭhukhawm a; dan loa a rûka electoral roll-ah Bru mi 200 chuang thun an nih vanga Kolasib district election officer Dr Arun T laka public interest litigation (PIL) an thehluhah, sum indaih lohna phuhrûk turin Kolasib district mipui aṭangin thawhlawm khawn an rel.

Kolasib Joint NGO chuan, district bawrhsap Arun T chu administrator ni tlakah an ngai lo rtih sawiin, “A kaihhruaina (chairmanship) meeting reng rengah Kolasib district chhunga NGO-te chu tel tawh loh ni se,” an ti a; pawl hrang hrang leh sorkar department-te pawh chief guest leh guest of honour atan Dr Arun T chu hmang tawh lo turin an ngen nghal.

Kolasib NGO-te chuan, electoral roll-ah dan loa Bru thun an nih vanga Kolasib NGO-te’n lungawi lohna an lantirna chungchangah, Joint CEO Zorammuana’n Kolasib DEO hnenah Bru-te electoral roll-a thun an nih dan ennawn leh tura hriattirna, November 6, 2018 zana a tihchhuah chu Dr Arun T ngenna avangin a lo sût leh niin an tarlang a, an lawm loh thu an sawi a ni.