Worldshop-a thil puakah mi 3 an thi

Nimin zing dar 9 rîk hma deuh khan Durtlang khaw chhung, Zuangtui-Selesih kawngpui kama workshop pakhatah electric detonator (kêp) nia hriat a puak a, mi pathum an thih bakah, mi dang pathum an hliam.

Durtlang Local Council chairman RC Lalrinliana hnen aṭanga thu dawn danin, thil puah lai hian workshop-ah mi pali - workshop neitu Lal­hmangaihzuala, Durtlang North leh amah puitu Immanuel Lal­mawikima (18), Sakawrdai te, workshop-a Bolero Pikup MZ-01S 5983 siamtir tura kal motor neitu Lalṭhafamkima, Sakawrdai leh driver Tang­sohrai, Damparengpui lam mite an awm.

Durtlang khawtlang hruaitute sawi danin, Bolero Pikup hnung lama welding an ti ṭan chiah tihin a puak a; police-te sawi danin, Pikup hma lama driver leh passenger ṭhutna hnungah electric detonator 900 hmuh a nih avangin thil puak chu electric detonator a nih rin a ni.

Pikup driver leh passenger seat hnunga electric detonator thuhruk 900 chu police-te'n an man nghal a, motor neitu Lalṭhafamkima wallet-ah India pawisa leh Myanmar pawisa eng emaw zat a awm bawk a; heng kaihhnawihah hian Bawngkawn Police Station-ah thubuai ziah luh a ni. Detonator-te chu Myanmar lama lak tur a nia rin a ni.

Thil puak avang hian a hmunah workshop neitu Lalhmangaihzuala (29) s/o Lalngilneia leh Pikup neitu Lalṭhafamkima (48) h/o Pardingliani, Sakawrdai te an thi. Workshop-a thawk dang Immanuel Lalmawikima (18) s/o Henry Lalrotluanga, Sakawrdai chu Synod Hospital thlenpui a nih hnuah a thi a; Tangsohrai pawh na taka hliamin, he thu ziah lai hian ICU-ah enkawl mek a ni. Anni bakah hian na vak loa hliam pahnih - Lalramzauva (a lú-ah) leh Zoramsanga (a ke-ah)-te an awm bawk.

Durtlang LC Chairman chuan, "Mita hmutute sawi danin, Pikup hnunga welding hna an thawk ṭan chiah tihin a puak a. Oxygen gas cylinder him pialin a la awm reng a, oxygen nena ṭang kawpa welding nana hman ṭhin carbide pawh a pawp a, mahse, thil dangin páwn lam aṭanga tihpawp niin a lang; workshop-a puak thei lam thil puak niin a lang lo. Workshop nei ve tho ka ni a, workshop-a thil puak thei awmte chu heti khawpa thawk ná hi a ni thei lo," a ti.

RC Lalrinliana chuan, thil puak chuan in pakua, chhungkaw 14 chenna a khawih chhiat thu sawiin, "Kawngkhar leh tukverh chhia te, tukverh darthlalang chhiate, bang tile chhiate a ni," a ti a; thil puah ṭanna motor bakah, a bula 407 truck pakhat chu a chhiat nasat thu leh, thil chhiate chu sorkarah an thlen nghal thu a sawi bawk.

Thil puahna hmun hi nimin khan bialtu MLA Vanlalhlana leh Aizawl mayor Lalrinenga Sailo, bialtu councillor ni bawkte'n an tlawh nghal a, thil puakin in a tihchhiatte thawm ṭhaa hnatlangte tan MLA-in Rs 5,000 leh Mayor-in Rs 50,000 an pe a ni.