Champhaiah kuhva dahna kudam a kâng
March 17, Ningani zanlai khan Champhai leilet záwla Lalpa Grape Huan bula kuhva dahna kudâm a kâng. Kudam kan chhan hriat a ni lo a, Champhai Police Station-ah thubuai ziah luh a ni.
Thu dawn danin, kudam kan ṭan hun hi zan dar 12 vel nia hriat a ni a, Fire & Emergency department-in ṭhelh tum mah se, kuhva ro a mût nasat avangin ṭhelh mih hleih theih a ni lo. Kudam neitute chhinchhiah danin, kudam chhungah kuhva ro ip 7,135 vel awm a, a kâng chhe deuh vek a ni. Kuhva bakah kudam chhunga dah Ashok Leyland tipper a kâng chhe vek a, kudam páwna tipper pakhat a kang chhe nual bawk.
Kuhva ro kâng chhe ta hlut zawng chu cheng nuai 1,500 chuang hûa chhût a ni a, lirthei kâng chhia chu cheng nuai 21 man vela chhût a ni thung.
New Champhai huam chhunga kudam kâng chu hâl ni ngeia an hriat avangin a neitu K Lalchhandama, Champhai Kahrawt Veng chuan Champhai Police Station-ah nimin khan FIR a thehlut a; he thu ziah lai thleng hian police-te'n rinhlelh man an la nei lo.