Lengpui Airport hi chei ṭhat mek ni loin tihchhiat mek a ni zawk - Mizoram BJP

BJP, Mizoram Pradesh hruaitute chuan, Lengpui Airport chu chei ṭhat mek ni loin, tihchhiat mek a ni zawka an hriat thu an sawi a; Lengpui Airport chei ṭhat chungchang leh tun hnaia chei ṭhat mek chim ta chungchangte chu Mizoram sorkar leh sorkar laipui hotute hnenah thlen­in, chei ṭhat dan endik a nih hma chuan hna chawlhtir turin an ngen.

Mizoram BJP-a Central Scheme Monitoring & Vigi­lance Cell hotute chuan nimin khan Aizawl Press Club-ah thuthar thehdarhtute an kâwm a; Lengpui Airport chei ṭhat mek March 15, 2022-a an enfiahnaa an hmuh dante an hrilh.

BJP-a Central Scheme Monitoring & Vigilance Cell vice chairman Lal­remsangi Fanai chuan, "Lengpui Airport chei ṭhat mek tih hi a ni tawh lo a, tihchhiat mek a ni zawk. A mawina zawng zawng an tichhia a, a páwn lama thing eng emaw zat an kit a ni. A pawi tak zet a, a thinrimthlak bawk," a ti.

Lalremsangi Fanai chuan, Airport chei ṭhat lai chim chu ram pum ang pawhin thil zahthlak a nih thu sawiin, "An bungraw hman zawng zawng khu endik ngai tak zet a ni a, endik a nih hma chuan siam chhunzawm tawh lo se kan duh," a ti a; in sak chima mawhphurtu ber chu Finance changtu chief minister Zoramthanga a nih thu a sawi.

Lalremsangi Fanai chuan, Lengpui Airport-a hna thawh mek chu tunah leh nakin zelah mipui tan a him tâwk loa an ngaih thu sawiin, "Tuna airport cute siam tumna kawnga iron & steel structure, cement concrete ban, beam, slab awm tawh sa bakah, bungraw hman tur thlenga mithiamte'n an endik hma chu hna zawng zawng chawlhsan rih turin kan phût a ni," a ti.

Airport enkawl hna chu hmun tam takah chuan Airport Authority of India (AAI) kutah emaw, private sector kutah emaw dah a ni tawh thu leh Lengpui Airport enkawl chungchangah pawh ngaihtuahna fim taka ennawn a ṭul thu sawiin BJP hotute chuan, "Airport hi AAI hnena hlan mai a ṭha kan ti, tiin ngaihdan fel tak kan nei," an ti a; airport enkawl chu a hautak thu an sawi.

Lalremsangi Fanai chuan, Airport chei ṭhat meka an thil hmuh dan chu ziakin sorkar laipuia Ministry of Civil Aviation, National Disaster Management Authority leh Finance Ministry bakah, Mizoram Chief Secretary leh Disaster Management & Rehabilitation department hnenah an thlen a, hna thawh mek chu endik a nih hma chuan chawlhtir turin an ngen tih a sawi a ni.

BJP Central Scheme Monitoring & Vigilance Cell hotute sawi danin, Covid-19 léng vanga harsatna thlenga mipui chhanchhuahna turin sorkar laipuiin Special Central Assistance hnuaiah a pung awm loin state tinte loan a pe a, a hmanna tur pawh tinzâwn sa neiin, mipui dâwm kânna atana hnathawh tur siamsakna tur a ni. Scheme hnuaiah hian sorkar laipuiin Mizoram sorkar hnenah cheng nuai 50,000 a pe a, chuta ṭang chuan Lengpui Airport siam nan cheng nuai 5,041 a nih bakah, phùl lem phahna, hall sakna leh thil dang atante hman a ni.