Covid-19 laka invên dan sikulah inzirtir a ṭul - Education Minister

School Education minister Lalchhandama Ralte chuan, Covid-19 laka invên dante nau­pangin an hriat theih nan sikulah inzirtir a ṭul thu a sawi.

March 17, Ningania School Education Com­plex Conference Hall-ah Samagra Shiksha Annual Work Plan & Budget 2022-23 thlirhonaah Lalchhandama Ralte chuan, kum hnih chhung naupangte sikul an kal theih loh avangin April thla aṭanga sikul luh ṭan tirhah naupangte chu zirlaibu luhchilhpui nghal ngawt loh ṭhaa a hriat thu a sawi a, "Chawlhkar hnih vel chu naupangte tihtlángnèlna tur sikulin an siam a ṭul a, Covid-19 laka invèn dante pawh naupangin an hriat theih nan sikulah inzirtir zui a ṭul a ni," a ti a; School Education hnuaia thawkte chu an mawhphurhnate ṭha taka hlen turin a sáwm.

Samagra Shiksha Annual Work Plan & Budget thlirhonaah hian science leh mathematics zirlaibu chu pawl 12 thlengin naupangin Mizo ṭawnga an hriat thiam theih nan English leh Mizo ṭawng hmanga ziah tum a nih thu tarlan a ni.

Samagra Shiksha hian pre-school aṭanga higher secondary school thleng a huam a, SCERT hnuaia DIET-te a huam bawk.

Ṭhutkhawmah hian Human Resource Deve­lopment Board vice chairman L Thangmawia, School Education secretary Lalzirmawia Chhangte leh director James Lal­rinchhana te bakah, MBSE Chairman leh Secretary, SCERT Director, School Education leh Samagra Shiksha officer-te an tel a ni.