Minister-in lungphùm pahnih a phúm

Minister of state Robert Romawia Royte chuan nimin khan Zawlnuam Tourist Lodge Complex chhunga Community Service Centre hnuaia sak ṭan mek leh Zawlnuam College-a ICT department leh NIELIT ṭangkawpin an din tur IT Skill Development and Training Centre lungphùm a phúm.

Lungphum puala inkhawmah Robert Romawia chuan, Zawlnuam College chu nuam ti taka a thawh tawhna a nih thu sawiin, "Minister ka nih hlim, 2019 kum tira Zawlnuam Tourist Lodge leh Zawlnuam College hall thar ka hawn kha minister anga ka thil hawn hmasak a ni. Kum thum chhunga a vawi hnihna atan Zawlnuam College-ah bawk IT Centre lungphùm ka phúm leh thei hi ka lawm hle," a ti.

Robert Romawia chuan, tunlaiah information technology thiamna a pawimawh thu sawiin, "IT Centre ruhrel peih veleh zirtirna kalpui zui a ni ang," a ti a; Zawlnuam College zirlaite bakah Zawlnuam leh a chhehvela ṭhalaite'n computer course chi hrang hrang an zirna tura ruahman a nih thu a sawi.

CSC hi PMJVK scheme hnuaiah cheng nuai 140 séng din tur a ni a, IT Skill Development and Training Centre chu cheng nuai 99 sénga siam tur niin, 50% chu Mizoram sorkar kutah a thleng tawh a ni.