Thenzawl leh a chhehvel hi khualzin hmunpui a la nih dawn - Lalduhoma

ZPM leader Lalduhoma chuan nimin khan a bial chhunga Buangpui Branch YMA hnenah lawngleng pahnih a pe a, Thenzawl Vengthar YMA hnenah futsal ball pathum leh goal lèn pahnih a pe bawk. Lalduhoma chuan, Thenzawl leh a chhehvel chu khualzinte hmunpui a la nih dawn thu a sawi.

Lalduhoma chuan, Buangpui ram chhungah hmun mawi leh hmingthang, mipuiin an hlut em em Tuirihiau leh Vantawng Khawhthla a awm chu vanneihthlak a tih thu sawiin, "Lui dung mar ṭha tak mai, nakin zelah pawh water sport atan pawha hman tlâk khawpa chei tham kan nei a, khawtlang leh YMA hruaitute'n a lui dung leh a chhehvelte ṭha takin in humhalh a, a lawmawm hle a ni," a ti.

Ministry of Tourism-in project lian tak, Vantawng Project an siam dawn tih sawiin Lalduhoma chuan, "Cheng nuai tam tak project a ni a, he lai hmun hian mipui tam zawk a hìp theih nan kan chei dawn a ni," a ti a; Thenzawlah Golf Course, Dîlpui leh Welness Center a awm avangin Thenzawl leh a chhehvel chu khualzinte hmunpui a la nih dawn thu a sawi a ni.