Thu dik loa mipui bumah Duhoma puh

Mizoram Pradesh Youth Congress Committee (MPYCC) chuan thuchhuah siamin, ZPM leader Lalduhoma chu thu dik lo hmanga mipui bum ṭhinah an puh a, sim turin an chah.

MPYCC chuan, March 9, 2022-a Assembly session-ah Lalduhoma'n, 'Kum 2008-ah kan inthlang leh a, Congress-te'n MNF sing nga hi kan lan loh chuan an ti leh a, NLUP kha hming thar vuahin NEDP an ti a, nuai khat sem an rawn zuar ve leh a, kum 10 an sorkarpui leh a,' tia a sawi chu thu dik lo a nih thu

an tarlang.

Congress party-in 'MNF MIP sing nga hi kan lan loh chuan,' tiin an sawi ngai lo nia sawiin MPYCC chuan, "NLUP hming thar hi NEDP tiin a vuah ngai hek lo. NEDP hi NLUP kal zel aṭanga lo piang niin, kum 2016 aṭanga kalpui chauh a ni. Hetiang taka mipui hma leh Assembly House meuh pawh zah loa thu dik lo sawitu ZPM leader Pu Lalduhoma hian ngaihdam dil rawh se," an ti.

NLUP dawngtu zat Lalduhoma'n a sawi pawh a dik lo nia sawiin MPYCC chuan, "NLUP hian Mizoram pum a dâp hneh hle a, Mizoramah kum 2011 chhiarpuiah chhungkua 2,21,077 awmin, April 2017 thleng khan chhungkaw 1,30,229 lai NLUP hian a tuam hman. Kum 2016 base line survey-ah khan Mizoramah BPL chhungkua 56,584 an awm bawk," an ti a; Synod Social Front-in zir chianna an neihah NLUP dawngtu zinga 10.3% chu political party-a inziak lut lo an ni tih hmuh a nih thu an tarlang.