Dik lo taka vawk la luttute police-in an man thei lo mak kan ti - MIPFA

Mizoram Pig Farmers' Association (MIPFA) chuan thuchhuah siamin, dan hrûla dik lo taka Mizorama vawk la luttute police-in an man thei lo chu mak an tih thu an tarlang.

MIPFA chuan, dan hrúla Mizorama vawk lak luh a pun leh tâk avangin sorkarin a ngen angin March 17, 2022 tlai aṭangin Sihhmuiah an duty thu sawiin, "Tukin (March 18) dar 8 vel khan vawk pasarih vel phur an awm tih hriain, Tanhrilah kan tiding a, Zonuam Police Outpost-ah kan hruai a ni," an ti a; police-te'n DC lam aṭanga thupek an hmuh loh avangin an chhuah leh thu an sawi.

December 2021 aṭangin African Swine Fever (ASF) vanga vawk thi Mizoramah a awm tawh loh avangin State Disaster Management Committee chairperson Chief Secretary-in February 31, 2022-ah order a tichhuah thu sawiin MIPFA chuan, "Order hian state dang leh ram páwn aṭanga vawk leh vawksa aṭanga siam lak luh khapna a hlîp a, vawk la lut turin dan zawm tur fel tak duan a ni. Hemi hrúlah hian dan zâwm loa vawk lak luh a tam avangin tun hnaiah Aizawl leh Mizoram khaw ṭhenkhatah ASF hmuh a ni leh ta a ni," an ti.

MIPFA tarlan danin, March 16, 2022 khan AH&Vety Secretary an hmu a, dan hrûla vawk lak luh chungchang chu enfiah turin DC tinah hriattirna an pek tawh thu a lo hrilh. March 17, 2022 khan AH & Vety Minister an hmu leh a, dan hrula vawk lak luh dan enfiahpui tur leh chutiang tite chu police-a hriattir turin a lo hrilh a ni.

ASF a darh leh mek lai leh DC tinte March 15, 2022-a hriattirna pek vek a nih tawh laia police-in dan loa thil tihte an man thei lo chu fel lo hlea an ngaih thu sawiin MIPFA chuan, "Police lamin order an la hmu lo a nih chuan outpost tinte hi rang takin order pek ni rawh se. Kan invèn theih lai hian chak taka hma kan lak a ngai. Dan loa vawk lak luh hrim hrim police-in an man thei lo hi a khawi lai ber hi nge dik lo tih sorkar kan zawt nghal a ni," an ti.