Ramsa vanga vanduaina tâwk mi 2 zangnadawmna pek a ni

Thenzawl Forest Division huam chhunga ramsa vanga vanduaina tâwk mi pahnih hnenah March 17, Ningani khan zangnadawmna (ex-gratia compensation) pek a ni a; ramsain thlai a tihchhiatsakte hnenah crop damage compensation pek a ni bawk.

Thenzawl DFO Lalbiakchama Chawngthu chuan, ramsa vanga vanduaina tâwkte hnenah sorkarin zangnadawmna a pe ṭhin tih sawiin, "Ramsa pelh avang emaw, an chhaih kawlh emaw vanga vanduaina tâwkte hnenah erawh zangnadawmna pek theih a ni lo. Nungchate humhalhna kawngah sorkar hmalaknate mipuiin an thlàwp ṭhat a ṭul," a ti.

Zangnadawmna hi November 10, 2020-a khuaiin a zûk vanga thi Biaksanga, Sialsuk chhungte hnenah Rs 2,00,000 leh Piangmawia, Thenzawl Hermon Veng hnenah rûlin a chuk avanga a inenkawlna senso atan Rs 48,477 pek a ni.