Covid-19 vei enkawl lai a tlem tial tial

March 17, Ningani khan Mizoramah Covid-19 vei mi 228 hmuh chhuah niin, hripui vei hmuh chhuah zat a tlahniam zel bakah, enkawl lai a tlem tial tial. Nimin khan hripui vei dam tawh mi 250 chhuahtir an ni a, Covid-19 vanga thi an awm lo.

Covid-19 vei Nilainia hmuh tharte chu mipa 94 leh hmeichhia 134 an ni a; RT-PCR laboratory-a hmuh chhuah paruk, TrueNAT hmanga hmuh paruk, RAT hmanga hmuh 212 leh FIA hmanga hmuh pali niin, positivity rate 14.29% a ni.

Nimin khan hripui vei dam tawh mi 250 chhuahtir an ni a; district tina chhuak zat chu - Aizawlah mi 55, Mamitah 80, Khawzawlah 44, Champhai leh Hnahthialah 18 ve ve, Saitualah 14, Hnahthialah 13 leh Kolasib-ah mi pariat an ni.

IDSP record angin, Mizoramah Covid-19 vei 2,22,205 hmuh chhuah a ni tawh a, mipa 1,03,677 leh hmeichhia 1,18,528 an ni a, mipa aiin hmeichhia 14,851-in an tam zawk. Nimin tlai dar 5 thleng khan mi 2,19,548 (98.80%) chhuahtir an ni tawh a, mi 674 (0.30%) thi tawhin, enkawl mek mi 1,983 (0.90%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,22,205 chu mi 1,000 zelah hripui vei mi 202 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.

Mizoramah March 17, 2022 thlenga swab sample endik tawh 18,78,717 aṭanga positivity rate chu 11.81% a ni a; RT-PCR hmanga endik zat percentage chu 19.83 a ni a, RAT hmanga endik zat chu 74.55% a tling.