KHAWTHLIR

Jubilee lawm
Zawlnuam Bawrai Veng Branch YMA chuan nimin khan an kum 70-na, platinum jubilee an lawm a, minister of state Robert Romawia Royte-in a hmanpui. Minister chuan, Bawrai Branch YMA-in platinum jubilee a thlen lawmpui nan Mizoram sorkarin Bawrai Vengah futsal, basketball leh volleyball-te indoor-a khelh theihna tur Bawrai Integrated Sports Centre (BISC) cheng nuai 130 sênga a din dawn thu a sawi a, "April 2022-ah hna ṭan tum a ni," a ti.

Lawmman sem
Khawzawl DEO leh Khawzawl College- Electoral Literacy Club-te'n 'My vote is my Future: Power of one vote' tih thupui hmanga college zirlaite tana poster insiamsiak an buatsaiha ti ṭhate hnenah nimin khan lawmman sem a ni.

DC-in kohhran hrem
Aizawl DC Dr Lalhriatzuali Ralte chuan, Model Veng Presbyterian Kohhran chu biak-ina inkhawmah an zai avangin Rs 1,000 chawi turin a hriattir. DC chuan, Model Veng Kohhran hi March 13, 2022 Pathianni khan zana an inkhawmah an zai tih tarlangin, "Task Force lamin an remti lo chungin Kohhran Committee-in zai lui turin a tih thu sawi a ni," a ti.

SRH-ah mi 35 awm
State Referral Hospital-ah Covid-19 vei enkawl an tlem tial tial a, nimin tlai dar 5 thlenga dinhmun angin mi 35 enkawl mek an ni. Mi 35 zinga 10 chu ICU-ah enkawl niin, chu'ng zinga pathum chu ventilator hmantir an ni a, oxygen pek mek 10 an awm bawk.

'Rose par eng'
Masi-a Chhakchhuak phuah poetry chi hrang hrang 102 dahkhawmna lehkhabu, 'Rose par eng' tih chu nimin khan Human Resource Development Board vice chairman L Thangmawia, MLA-in a tlangzarh. L Thangmawia chuan, "Hla hi hnam inpumkhatna atan leh inunauna ṭha siam theitu a ni," tiin, hla tam zawk phuah zel a nih a beisei thu a sawi.