Ramri bula kawng laih enfiah a ni ; Ram lâk tur a la awm duai - Kolasib DC

YMA, Sub-Headquarters, Kolasib bultumin Kolasib district thuneitute leh Kolasib District MJA member-te chuan March 19, Inrinni khan Mizoram chhung, Assam lam hnaiha kawng laihte an enfiah. Kolasib DC Dr H Lalthlangliana chuan, ram lâk tur a la awm duai thu sawiin, chu'ngte chu Pathianin Mizote a pek theih nan theihtawp chhuah a ṭul thu a sawi.

Kawng laih enfiah pual hian Rangneklian camp-ah inkhawm tâwi buatsaih a ni a; Dr H Lalthlangliana chuan, ramri hrúla kawng sialte chu Mizoram mipui thawh rah a nih thu sawiin, "Thil hi a hun a awm a, a hun tak zelah chung lamin hna a thawk ṭhin," a ti.

Bawrhsap chuan, "Kawng laih chung­changah rem lo tak tak a awm a, Assam lamin min laih khalh kan hlauh avangin a remchang ang angin kan lai pawp pawp a ni," a ti a; tuna hmalakna kal lai chu chhunzawm zel a nih loh chuan nakinah a theih loh hun a thleng thei tih a sawi.

Kolasib-ah a awm rei dawn tawh lo tih sawiin H Lalthlangliana chuan, ram lâk tur laklawh a la tam avangin a awm loh hnuah pawh a tàwp thlen a pawimawh thu a sawi a, "Keini kan awm emaw, awm lo emaw, ram lâk tur a la awm duai mai si a, Pathianin hun a tih lai hian kan lâk ngam loh chuan min pe lo hlen mai ang. Min pek hlenna turin kan puanven sáwi chhíng ila, theihtawp i chhuah ang u," a ti.

Kolasib DC chuan, Vairengte-ah civil lamin Assam lamah hma an sawn laiin, administration lamah hnungtawlh a nih thu sawiin, "Vairengte-ah SDO (C)-a ka awm lai kum 2005-2008 chhung khan buaina a chhuah rêng rêngin Lailapur-ah kan duty a, harsatna awmah Dholai lei (bridge) chin chu Vairengte police case-ah kan register ṭhin. A hnuah inthlahdahna tlem a lo awm a, tunah chuan IR camp thleng bak thlang lam chu tawlh thlâk thiang lo ang hialah kan ngai tawh," a ti a, Mizoramin a chàn tawhte chu lâk lêt leh a harsat thu a sawi.

Tuna ramri hnaiha kawng laihnaah Pathian malsawmna an dawng tih sawiin H Lalthlang­liana chuan, "Tun thlengin harsatna tâwk loin kan kal zel a, Pathianin ram min pek a duh laia a ram neitu zawkin kan luah ngam lo emaw, kan luah thei lo emaw, kan luah peih lo emaw, hma kan la ngam lo emaw a nih chuan kan mawhphurhna a ni," a ti.

Bawrhsap chuan, ramri chungchangah Assam nen inkah lek lek cháng a awm ṭhin thu sawiin, "Chutiangah chuan ṭawngkam khat lekah mi 100 rual an tlânchhe ṭhin, a chhan chu ṭawngṭaina rah a ni," a ti a; Zophaiah pawh Mizoram leh Assam sipaite an inkâp hman ṭêp tih a sawi.

MJA, Kolasib president Andrew VL Auva chuan, ramria kawng laihte chu Mizoram mipuiin ṭha an ti tih a sawi rualin, sum tam tak sênga kawng laih tawhte chu fûr leh ṭhála kal theih tura siam theih ni se ṭha a tih thu a sawi a; Lailapur-ah lirthei tihdin awm fo chu Mizote harsatna siamtu a nih avangin thuneitute'n enfiah se ṭha a tih thu a sawi bawk.

Kolasib Sub-Hqrs YMA president Thomas D Lalengliana pawhin, Assam nena inkahna a thlen hnuah tun thlengin kawng km. 100 vel sial a ni tawh tih sawiin, "Tuirial piah lam, Aizawl district-a awm Mauchar lamah chuan Khawbawn panin kawng km. 5 vel laih tawh a ni a, Khawbawn tláng (1875 ramri) thleng turin laih loh km. 20-30 vel a la awm a, thlen tumin hmalak mek a ni," a ti.

Rangneklian camp (political map-a Mizoram chin) aṭangin km. 5 vel kawng laih a ni tawh a, a piah lawkah Dholai area (1875 ramri) a awm tawh nia sawi a ni.