Sorkarin ration buhfai a semah sum tam tak a châwi belh ṭhin

Food, Civil Supplies & Consumer Affairs (FCSCA) department chuan mipui hnena ration buhfai a semnaah kum tin cheng vaibelchhe eng emaw zat a chawi belh ṭhin.

FCSCA department aṭanga Vanglaini thu dawn danin, mipui hnena ration bufai semna atan hian Mizoram sorkar chuan kum 2019-20 khan cheng vbc. 55.09, kum 2020-21 khan cheng vbc. 47.41 leh kum 2021-22 ah cheng vbc. 79.03 a chawi belh.

Mizoramah ration card 2,79,531 a awm mek a, mi 11,60,826 hming a chuâng. Mizoramin kum khat atana buhfai a mamawh zata chhût chu quintal 9,88,898.58 a ni.

Hetih lai hian, Mizo­ramin kum khat chhunga buhfai a mamawh tâwk bakah hian buhfai phur motor leh lawng chetsualna, chhiatrupna lian tham avanga buhfai mamawhna, kudam hul ṭhat loh leh zûvâ vanga buhfai chhiat palh leh thil dang thleng thut thei laka inrálrinna atan thlavéngah 10% vel huam teltir ṭhin a ni bawk.