Kolkata-ah Chapchar Kût hmang

Calcutta Mizo Welfare Association (CMWA) chuan March 18, Zirtawpni khan Mizoram House, New Town-ah Chapchar Kût an hmang a, minister of state TJ Lalnuntluanga'n a hmanpui.

Chapchar Kût hi CMWA president Rev. JC Lalramliana'n a kaihruai a; TJ Lalnuntluanga chuan, hnam nihphung leh ziaráng chawisan zel a pawimawh thu a sawi a, "Chapchar Kût hi hlawhchhamna leh beidawnna aṭanga lo chhuak anga sawi ṭhin ni mah se, zirtirna ṭha tak a keng telin ka hria. Khawvel hi a êng zawnga thlir thiam a ṭul a, beiseina nung nen hmalam kan pan tur a ni," a ti.

Social media hmanna kawngah fimkhur a ṭul thu sawiin Minister chuan, "Kan thu hriat leh chhiarte hi thu dik a ni em tih bèl chiang hmasa ṭhin ila, ngaihtuah chiang lo taka thil kan ngaihruatna nen kan va sawi vak vakin mite rilru kan hliam viau thei," a ti a, hawihháwm taka ṭawngkam hman inzir thar a ṭul thu a sawi.

Chapchar Kutah hian zài leh hnam làmte entir a ni a; Kolkata Mizoram House joint resident commissioner Jacob Lalawmpuia pawhin Chapchar Kût pawimawhna a sawi a ni.