Councillor-te'n plastic road an zirho

Aizawl Municipal Corporation (AMC) councillor-te chuan Mizorama plastic road hmasa ber, Reiek Tourist Resort panna kawng chu a hmunah riah chilhin an zirho a; AMC Solid Waste Management Committee member te, Save Chite Lui Coordination Committee hruaitu te, Reiek VC hruaitute leh Zotrex Adventure Club member-te'n an ṭawiawm.

Plastic road zirhonaah hian councillor pakua - deputy mayor R Thanglura, executive councillor Laltlanzova Khiangte, Solid Waste Management Committee vice chairman John Zosangliana Ralte, Rosiamngheta, Vanlalneia, Lalfakzuala Chenkual, Ramthanzauvi, Zodingpuii leh David Zohmangaiha te an tel.

Tourist Resort panna kawng hi Chite luia polythene hnawmhnawk chhar khawm hmangin Mizoram PWD leh Save Chite Lui Coordination Committee hmalaknain kum 2020 khan siam a ni a; metre 800-a thui, metre 5.50 vela zau a ni. Kawng siamna atan hian plastic her nâwi hman a ni a, rora leh alkatra chhuan satah pawlh niin, alkatra kg. 100-ah plastic kg. 8 zel hman a ni.

Plastic road zir chian rual hian Zotrex Adventure Club kaihhruaiin Reiek tlang thenfai hnatlang an nei nghal a; Reiek tlang tlawhtute hnutchhiah bawlhhlawh eng emaw zat chhar fai a ni.