CS-in mipui rawngbawlna rilru púa Thawk turin sorkar hnathawkte a chah

Chief secretary Dr Renu Sharma chuan March 19, Inrinni khan Khawzawl district-a sorkar hmalaknate a tlawh a, sorkar hnathawkte chu mipui rawngbawlna rilru pu chunga hna thawk ṭhin turin a chah.

DC pisa conference hall-a sorkar hotute nen an inkawmnaah Renu Sharma chuan, Mizoramah ṭum thum a awm tawh tih sawiin, "Finance, GAD, Home leh DPAR department-ahte ka awm ṭhin avangin Mizoram leh sorkar hnathawkte kalphung ka hre chiang. Hna in thawhnaah a ṭha zawnga danglamna thlentu ni ang che u," a ti.

Dr Renu Sharma chuan, China leh Europe ram ṭhenkhatah Covid-19 a hluar leh mek tawh tih sawiin, India sorkar pawhin state tinte fimkhur turin a chah thar leh tawh tih a sawi a; Covid-19 chungchanga inkaihhruainate zâwm ṭha turin a chah a ni.

Chief Secretary hnenah hian Khawzawl bawrhsap CC Lalchhuangkima'n an district dinhmun tlangpui te, sorkar project langsar zualte a hrilh a; police leh damdawi lam hotute'n an hmalaknate an hrilh bawk.

Chief Secretary hian Khawzawl Darngawna Mualvawm Field siam mek leh pavillion sak mek te, Dinthar venga DC office complex leh DRDA office tur sak mek te, Hermon Venga District Hospital leh Chief Medical Officer office sak mek leh Pengpui, Darngawna Solid Waste Management Centre sak mek te, Dinthar venga SP Office leh KVK, Kawnzara cold storage bunte a tlawh a ni.