Hmunphiah siam zirna khâr

Hnam Chhantu Pawl chuan Lengpuia an hmuna hmunphiah siam zirna, Short Course Training on Broom Making an buatsaih chu March 18, 2022 khan an khâr a, khàrna inkhawm hi MJA president Zonunsanga Khiangte-in a hmanpui.

Zonunsanga Khiangte chuan, kut themthiamna chu a hlut thu leh tu'ma chhuhsak theih loh a nih thu sawiin, "Kut themthiamna hmanga hnathawh hi eizawnna ṭha tak a ni a, kan thiamnate tu'ma chhuhsak theih a nih loh avangin taima taka kan thawh chuan Pathian malsawmna pawh kan dawng zel ṭhin," a ti.

Hmunphiah siam zirnaah hian Chhiahtlang leh Keiṭum khuaa mi pakua telin, chawlhkar khat chhung an zir a, mi dangte an la zirtir chhâwng leh dawn a ni.