Covid-19 vangin mi 675 thi tawh

Nimin khan tlai dar 5 thlengin Mizoramah Covid-19 vangin thi an awm lo a, March 18, Zirtawpni zan leh March 19, Inrinni tlaiah mi pakhat ve ve an thi. Mizoramah hripui vangin mi 675 an thi tawh a, kumin March thla bikah mi 17 an thi tawh.

March 18, Zirtawpni zan dar 10:30 khan Rangkhumi (75), Thenzawl, Serchhip district chu hripui vangin State Refferal Hospital-ah a thi a, natna dang nei tel a ni. Covid-19 positive a ni tih February 28, 2022 khan hmuh chhuah a ni a, SRH-ah dah luh nghal a ni.

March 19, Inrinni tlai dar 4:40 khan SN Ahmed (73), Lunglei Ramthar Veng chu hripui vangin Lunglei Dedicated Covid Health Centre-ah a thi a, natna dang nei tel a ni tih sorkar thuchhuakin a tarlang.