KHAWTHLIR
Vaccine dose 14,98,882 pe tawh
March 19, Inrinni thleng khan Mizoramah mi 8,10,940 hnenah Covid-19 vaccine dose 14,98,882 pek a ni tawh. Vaccine la tawh mi 8,10,940 zinga 6,62,629-in dose hnihna an la tawh a, mi 25,313-in precautionary dose an la tawh bawk. March 19 bikah chuan vaccine dose 26 pek a ni a, mi pahnih hnenah dose khatna, mi 22 hnenah dose hnihna leh mi pahnih hnenah precautionary dose pek a ni.
Inkhawmah zai
Mizoram sorkarin Covid-19 inkaihhruaina thar, March 16, 2022-a a tihchhuahah inkhawmnaa zai phal leh phal loh a tarlang lo a, zai khap a nih loh avangin Mizorama tualchhung kohhran tam tak chu March 19, Inrinni zan aṭang khan inkhawmah an zai ṭan nghal nia thu dawn a ni.
MJA lungphun
MJA, Lawngtlai district chuan March 18, Zirtawpni khan Lawngtlai Press Club-ah MJA Golden Jubilee lungphun hawnna inkhawm an buatsaih a, Lawngtlai East bialtu MLA H Biakzaua'n a hawng. MLA hian Lawngtlai MJA hnenah Rs 20,000 a pe a ni.
DC-in khua tlawh
Siaha bawrhsap Lalsangliana chuan tun hnai khan Siaha district khawchhak tlangdunga Noaotlah, Lobo, Chhaolo, Siata leh Chakhei khuate a tlawh. Bawrhsap chuan, Myanmar ráltlânte an enkawl dan chu lawmawm a tih thute a sawi rualin, kângmei laka fimkhur tur leh faina kawnga ṭan la zual turin a chah. Chhaolo refugee camp-a sem tur blanket leh an mamawh hrang hrangte khawtlang hruaitute hnenah a hlan nghal bawk.
Public toilet hawng
AMC Ward-III councillor C Lalchhandami'n kum 2021-22 Property Tax Return sum hmanga Ramhlun North Bazar building-a vantlang zunram thiarna (public toilet) a siamṭhat chu March 19, Inrinni zing khan a hawng. Hmeithai harsa zualte hnenah tuizem a sem bawk. C Lalchhandami chuan, "Property Tax Return 2021-22 hi a bo a bâng awm loa dik taka khawtlang hmasawnna turin Ward Committee-in a rèl anga hman a ni," a ti.