Candidate 8-in criminal case an nei

Association for Democratic Reforms (ADR) hotu Biswendu Bhattacharjee chuan nimin khan Aizawl Press Club-ah thuthar thehdarhtute a kâwm a; November 28-a Mizoram inthlanpuia can­didate mi 209 zingah mi pariatin thubuai (criminal case) an nei mek a, chu'ng zingah chuan thubuai lian neite pawh an awm thu a sawi. Thubuai pahnih nei pakhat a awm a, chu chu MNF president Zoramthanga a ni.

Biswendu Bhattacharjee hian MLA candidate-te'n affidavit an thehluhte ADR-in a zir chiannaa an hmuhchhuahte a tarlang a; kumin inthlana thubuai neite zinga party lian pahnih INC leh MNF president ve ve an tel thu a sawi a; kum 2013 inthlanah chuan candidate 142 zinga pathum (2%)-in criminal case an neih thu a sawi a ni.

MNF president Zoramthanga chuan thubuai pahnih a nei a, eirua puhna thubuai a tel ve ve. September 15, 2010-a ACB-ah FIR thehluh a nih avangin IPC Section 120B, 409 leh 34 hnuaiah te, Prevention of Corruption Act (PC Act) Section 13(1)(c) & (d) leh 13(2) hnuaiahte thubuai ziah luh a ni. Zoramthanga lakah hian ACB-ah vêk December 16, 2009-ah FIR thehluh a ni bawk a; IPC 477, 201, 109 hnuaiah te, PC Act Section 13(2), 13(1)(b)(e)(d) hnuaiahte thubuai ziah luh a ni.

ADR-in candidate-te affidavit thehluh an zir chian hnua an tarlan danin, Congress party president Lal Thanhawla chuan Serchhip district-a thubuai a nei mek a, kum 2013 MLA inthlana affidavit a thehluhah Kolkata-a a inhmun neih chu ziak tel loa zêpa puhna thubuai a ni.