Zonet-in chhiah an awl ru - MNF

MNF Vigilance & Legal Committee chuan nimin khan Aizawl Press Club-ah thuthar theh­darhtute kawmin, Zonet Cable TV chu chhiah awl ruah an puh.

MNF Vigilance & Legal Committee chair­man Lalhmingliana chuan Zonet hian Mizoram Value Added Tax Rules hnuaiah chhiah (entertainment tax) chawi tur an neih thu tarlangin, "Chhiah chawi tur zat hi Zonet TV pawttu (subscriber) zat aṭanga tehkhawng siam a nih avangin Zonet Cable TV neituten anmahni TV pawttu zat an thehluh tam leh tlem a zirin chhiah an chawi tamin an chawi tlem a ni," a ti.

Lalhmingliana tarlan danin, Zonet TV-in sor­kara subscriber an neih zat an report dan chuan kum 2005 leh 2006 khan mi 1200 tling loin an pawt a, 2007 aṭanga 2013 chhunga Zonet pawttu tam lai berin mi 1930 in an pawt a, 2014 aṭanga 2016 chhung hian mi 5000 bawr velin an pawt a, 2017 ah chuan mi 3138 chauhin an pawt a ni.

Kum 2014 January atanga kum 2017 December thleng hian Zonet TV pawttu hi mi 3138 ngar ngar an nih thu sawiin Lalhmingliana chuan, "Kum li chhungin Aizawl khawpui chhim lamah Zonet TV pawttu thar emaw pawt ta lo (disconnect) emaw pakhatmah an awm hauh lo hi a mak a ni. Hetianga chhiah awl duh vanga sorkar dawt hrilh hi sual lian tak corruption a ni," a ti.

Lalhmingliana chuan Zonet TV hian sorkar aṭangin insawifiah tura tihna leh dik taka chhiah pe tura tihna lehkha leh dik taka chhiah pe tura tihna lehkha an dawn an chhân loh thu sawiin, "Sorkar thu pawh pawisa lo leh chhan pawh chhang ṭha duh loa chhiah awlruk vanga dawt sawi hi zia lo kan ti hle," a ti.