Thil dik lo leh fel lo titute dopuiah MPF-in Mizoram mipuite an sáwm

Mizoram People Forum (MPF) hruaitute chuan nimin khan Aizawl Press Club-ah thuthar thehdarhtute an kâwm a; thil dik lo leh fel lo titute dopuiah Mizoram mipuite an sáwm.

MPF general secretary Rev.Dr R Lal­biakmawia chuan, MPF chu kohhran leh tlawmngaite thawhhona a nih thu sawiin, "MPF hian tu party mah ṭan bik leh duhsak bik a nei lo. Dik tak leh fel taka thil ti vek turin mipui leh party zawng zawng kan ngen a, thil dik lo leh fel lo titute chu kan zavaiin i do ṭheuh ang u. Kan ramah Pathian ram a thlen a, a duh zawng kan tih ṭheuh theihna atan ṭan i la ang u," a ti.

Rev.Dr R Lalbiakmawia chuan, political party leh an member-te chungah MPF an lawm tih sawiin, "Thawhhona Thuthlung kan siamte a hlawhtlin theih nan theihtawpin ṭan kan laho a, hmun ṭhenkhatah bawhchhiatna a awmin party hruaitute hnenah kan thlen a, anni'n thiam takin min lo dawngsawng ṭhin a, an theih angin hma an la nghal ṭhin niin kan hria a, kan lawm hle," a ti a; thawhhona ṭha tak avangin inthlanna muanawm leh ṭha tak a awm dawna an hriat thu a sawi.

MPF-in political party-te an ngenna
* Inthlan kan hnaih ta hle a, retheite an retheihna denchhena tumah lei lo turin kan inngen a ni. Vote lei hian nasa takin nungchang (moral) a tichhia a, chuvangin, candidate-te leh an campaigner zawng zawngte Pathian duh zawnga campaign a, vote lei lo turin Pathian hmingin kan ngen.
* Thawhhona Thuthlung 5(2)-ah, 'Mimal chungchâng leh tualchhûng thil chauh ni loin, party policy leh programme hi campaign-na leh inzawrhna atân hman ni se. Dâwt leh thu belhchian dâwl lo leh finfiah nghâl mai theih loh hmanga inbeih hi tih loh ni se' tih a ni. Hei hi a hlawhtlin ngei theihna atan theihtawpa ṭan la turin party tinte kan ngen a ni.
* Party insawichhiatna hi chin tâwk nei turin kan inchah a ni. Sorkar kal tawhte'n kan ram tan thil ṭha tam tak an ti tawh tih kan hria. Mahse, thil ṭha engmah tih nei lo anga insawichhiat vak vak hi a ṭha lo a, an thil tih chhunzawm tlakte chu chhunzawm zel a ṭul.
* Party tinte'n manifesto ṭha tak tak an nei ṭheuh a, an tihpuitlin chuan ram tan an ṭha vek. Tlin duh vanga kan party tih turte anmahni vote loh vanga chang ve lo tur ang leh, a vote-tute duhsak bik tur anga invauna leh intihṭhaihnate hi MPF chuan ṭha a ti lo. Silai leh thil dang hmanga intihṭhaihna reng reng a ṭhat loh avangin kan do tlang ṭheuh tur a ni. Hel lema chan chungchang chanchinbua lo langte hi a pawi kan ti a, tumahin helte hmanruaah kan hmang tur a ni lo.
* MLA-a thlan tlinte sum leh nihna (position) hmanga inhralh lo turin kan ngen. Thawhho a ngai a nih pawha zahawm taka thawkho turin kan chah duh a, Krista thisena lei kan nih ang ngeia rinawmna leh dikna chelh tlat turin kan ngen duh bawk.

MPF-in mipui an ngenna
* Sum leh pai leh therhlo hmanga lei theiha awm lo turin mi zawng zawng kan ngen a, sum leh therhlo hmanga min lei tumtute hi kan ram hruaitu atan an ṭhat loh avangin tumahin vote loh tur.
* Thawhhona Thuthlung bawhchhiat pawisa lotute hian kan ram dan leh inkaihhruaina te, kohhran leh khawtlang inkaihhruainate hi an ngaih pawimawh a rinawm lo. Election Model Code of Conduct leh election dante palzût a, Thawhhona Thuthlung kan siam ngei pawh pawisa lotute hi chu kan ram tan an ṭhat a rinawm lo.
* Inthlanna thianghlim leh ṭha kan lo neih theih nan leh thlamuang tak leh hlim taka kan inthlan theih nan Pathian hnenah nasa takin i dil ang u.