Inthlan hun sawn hlat a nih ka ring lo - CEO

23rd November, 2018

Mizoram chief electoral officer (CEO Ashish Kundra chuan nimin khan State Media Centre, Secretariat Annex-I ah thuthar thehdarhtute a kâwm a; Kolasib district election officer (DEO) Dr Arun T laka Gauhati High Court, Aizawl Bench-a PIL thehluh a nih avangin, inthlan hun sawn hlat a nih a rin loh thu a sawi.

Vanglaini palai zawhna chhangin Ashish Kundra chuan, Kolasib NGO-te'n Kolasib DEO laka complaint Court-a an thehluh chu PIL ni loin, election petition tur a nih thu a sawi a, "Chu bakah, election petition hi thehluh theih hun a awm a, candidate puan tawh hnuah chuan a theih loh. Affidavit naktukah kan thehlut ve ang. Chuvangin, PIL avang hian inthlan hun sawn a ngaih ka ring lo," a ti.

Candidate zinga thubuai neite'n Supreme Court thupek anga tualchhung chanchinbu darh zau berah an thubuai neih an tarlan loh chungchangah CEO chuan, Election Commission of India (ECI) guidline leh Supreme Court order zir chianga hma a lak tur thu a sawi.

Ashish Kumar chuan, Kolasib DEO-in Tripura relief camp-a Bru-te electoral roll-a a thun danah tihsual a nei lo niin a sawi a, "Bru camp aṭang hian electoral roll-a thun dilna 1000 chuang a lut a, ERO-te'n an hnâwl vek a ni. Appeal hun chhungin appelate authority DEO-ah mi 400 chuangin an thun a, hearing awm lo mah se, uluk taka zir chian a nih hnuah mi 200 chuang thun an ni," a ti.

Tripura relief camp-a Bru-te'n Kanhmuna vote an thlak theihna atan theihtawpa inbuatsaih a nih thu sawiin CEO chuan, "Kanhmun leh Tripura camp pawh ka tlawh tawh. Bru-te chuan an camp-a vote an thlak duh thu an sawi. Mahse, Kanhmuna vote thlak tura ruahmanna siam vek a ni," a ti a; Bru-te'n ṭha taka vote an thlak theihna tur Tripura CEO leh sorkar official dangte pawh a sawipui tawh tih a sawi.

Ashish Kumar chuan, Kanhmunah tlawmngai pawl hruaitute a kawm thu sawiin, "Min thlâwpnaah ka lawm hle. NGO hruaitute hian ṭha taka vote thlak a nih theihna atan tlawmngaia hnatlang tur inruat pawh an hreh lo. Bru vote thlak tura lo kalte chu ei leh in turte lo pek an huam a ni," a ti.