Party mal sorkar ni lo kan mamawh - ZPM

Zoram Peoples' Movement (ZPM) hruaitute chuan nimin khan Hnahthialah thuthar thehdarhtute an kâwm a; Mizoramin party mal sorkar ni lo a mamawh tih a sawi.

ZPM vice chairman Rev. Darchungnunga chuan, Mizoramah roreltute leh mi thil ti thei ṭhenkhatte'n hma an sawn zel tih sawiin, "Chutih laiin mipui tam zawk, kut hnathawktu mi retheite'n hma an sawn ve thei lo a, rahbeha awmin, eichawp dapin an la awm reng. Ram rorelna ṭha loah lal leh mi thil ti theite'n nuam an chên a, mi rethei rahbehin an awm ṭhin," a ti.

Mizoramin party mal sorkar ni lo a mamawh nia sawiin Rev. Darchungnunga chuan, "Mipui sorkar dik tak kan mamawh em em tih kan hria a, chumi atan chuan theihtawp chhuah ṭul kan ti. Party flagship programme pawh an lo sorkar hnua ram mipui ta anga hmang lo a, an party mite bik hamṭhatna tura an hmangte hi thil dik lo tak a ni," a ti a; duhsak bik neih chu corruption siamtu a nih thu a sawi.

Rev. Darchungnunga chuan politician a nih loh thu sawiin, "Pathian rawngbawl ṭhin pastor kan ni a, kan ram hi kan veiin chhan chhuah tlak a la awm avanga hetianga pên chhuak hi kan ni. Kan ram sorkarna kengtute hian mipui huap zo lo taka sorkarna an ken tâk deuh deuh vangte hian kan ram hi Chanchin Ṭhain bul a tum sak ram, a mi chêngte Kristian nih deuh vekna ram nih nen a inhmeh ta lo hle," a ti.

Zawhna chhangin ZPM hruaitute chuan, tun ṭum MLA-ah sorkarna siam ngei an inbeisei tih an sawi a, "Sorkarna kan siam ta lo a nih pawhin kal zel kan tum," an ti a; South Tuipui bial mipuite chu party-a an nihna dah ṭha a, ZPM candidate Phairothanga vote ṭheuh turin an sáwm a ni.