Zu zawrh thu-ah kohhran kan ráwn dawn - Congress party

Congress party Media depart­ment hotute chuan, zu chung­changah kohhran hote nasa takin an ṭawngṭai tih sawiin, zu zawrh chungchangah kohhran an ráwn zel dawn niin an sawi.

MPCC Media chairman Lallianchhunga chuan, Mizoramah kum 17 chhung MLTP Act hnuaiah zu khap (total prohibition) a ni chungin zu a hluar reng tho niin a sawi a, "Zu chhia a tam a, zu chhe in vanga thi pawh an tam. Hetiang a nih avang hian kan kal dan hi ennawn a ngai niin mi tam takin an ngai a. Zu chhe in vanga mi tam tak an boral bakah, Mizoram páwnah Mizo kan hmingchhe zeuh zeuh a, chuvangin Congress sorkar chuan July 10, 2014 khan The Mizoram Liquor (Prohibition and Control) Bill, 2014 a pass a, March 2015-ah hman ṭan a ni ta a ni," a ti.

Thununna (control) hnuaia zu zawrh vanga titi a tam chhan chu, ‘Kohhran kan ráwn dawn lo’ tih

ṭawngkam hman vang nia sawiin Lallianchhunga chuan, "Khatih laia Excise minister R Lalzirliana chuan he tawngkam hi Tualbung khuaa a thusawinaah a sawi a, rang takin ram pum a fan chhuak nghal a ni," a ti a; R Lalzirliana chuan, Assembly House-a MLPC Bill sawihonaah 'Pathian pawhin rem a ti a niang, hei MLPC Bill pu lut turin ka rawn kal thei a ni…' tiin a sawi niin a sawi bawk.

Lallianchhunga chuan, kohhran mipui zah avangin zu zawrh chungchangah Congress party-in ngaihdan felfai tak a neih theih nan MLPC Study Group leh MPCC OB & CLP inràwn khawmna nei turin Excise minister R Lalzirliana hnenah July 27, 2018-ah lehkha thehluh a nia sawiin, "Khatih lai aṭang khan Pu R Lalzirliana hi party-ah a hel rûk avangin Study Group leh MPCC OB & CLP inkawmhona turin hmalakna a nei duh lo," a ti.

MPCC Media Chairman chuan, "Kohhran mite ráwn duh lotu Excise Minister kan neih avang khan Congress party khâ a chih a, Pu R Lalzirliana thusawi khan Congress hruaitu leh mipuite rilru a tina em em a ni," a ti a; R Lalzirliana chu MNF-ah a awm tawh avangin Congress party-in MLPC Act chungchangah ngaihdan a puang thei ta niin a sawi.