PM Modi-a'n Mizoram a rawn tlawh NGO-in Bru chungchang an lo thlen

Prime minister Narendra Modi chuan nimin khan lehlángin Mizoram a rawn tlawh a, Lungleia vantlang inkhawma thu a sawi hnuah, Aijal Club-ah NGO Coordination Committee hruaitute nen an inkâwm. Joint NGO hruaitute hian Prime Minister hnenah hian Bru chungchang leh Lalnunmawia Chuaungo, IAS chungchang an thlen.

Joint NGO chairman Vanlalruata, Central YMA president chuan, NGO hruaitute'n Prime Minister an kawmnaah hian memorandum thehlutin, Tripura relief camp-a Bru-te chungchang an thlen tih a sawi a, "Bru chungchanga buaina hi kum 21 aia rei a nih tawh avangin, he buaina hi chinfel vata tihtawp a hun tawh tih kan hrilh a ni," a ti.

Vanlalruata sawi danin, NGO hruaitute chuan Prime Minister hnenah hian Bru-te chu Tripura camp-a an awmna a rei tawh avangin an lo let a hun tawh thu te, Mizorama awmsate'n harsatna an tawh ngai loh thu te, Mizoramah Bru leh Mizote ṭha taka kan chenhi thute leh a lo let duh lote thu an ngaihthlak ṭhin avanga buaina ṭha lo zawk a thlen ṭhin thute an thlen a ni.

Joint NGO secretary Lalhma­chhuana pawhin Bru-te'n kum 1997-a Mizoram an chhuahsan aṭanga tun thlenga an awm dan, thil thleng zawng zawng leh Mizote chunga an chet dante kimchang takin ziaka an thlen thu a sawi a, "Ṭanpuina pek chhunzawm zel ṭha kan tih loh thu kan thlen a, Bru issue hi tawp tawh se, Mizorama rawn let duh rawn letin, a let duh lote chu Tripura-ah awm hlen mai se kan duh thu leh chutiang tura hma la tura kan beisei thu kan thlen a ni," a ti.

NGO-te thil thlen chungchangah hian Narendra Modi chuan, inthlan lai a nih avangin NGO thu thlente chu tih mai theih a nih loh thu leh, inthlan zawhah chinfel theih dan a dappui tur thuin a lo chhang a ni.

Joint NGO Chairman chuan, hêkna a tawh vanga Mizoram aṭanga sawn chhuah tâk Home secretary Lalnunmawia Chuaungo chungchang Prime Minister hnenah an thlen tih sawiin, "Mizoram aṭanga lak chhuah a ni chu kan hrethiam lo a, a rawn lêt satliah mai pawh ni loin, mawhphurhna sang zawng chelhin, Chief Secretary ni se Mizo mipui rilru ná thawi damna atan a pawimawh," a ti.

Lalhmachhuana chuan, "Kris­mas thilpek atan Lalnunmawia Mizorama dah let turin kan ngen a, Lalnunmawia hi kan hero a nih thu kan hrilh," a ti a; PM Narendra Modi pawhin Lalnunmawia Chuaungo chu a mi hriat chian leh a thawhpui ṭhin mi ṭha tak a nih thu te, Mizorama dah let a nih theih nan theihtawp a chhuah tur thu NGO hruaitute a hrilh tih a sawi.

Narendra Modi hian nimin chawhma dar 10 pelh hretah PM thlawhtheihna hmangin Lengpui Airport a thleng a, airport aṭangin helicopter-in Lunglei a pan a, Lungleia vantlang inkhawmah thu a sawi. Lunglei aṭangin helicopter-in Aizawl a pan a, Aijal Club-a hun a hman zawhah New Delhi panin a haw nghal a ni.