Pawngsualtu kum 17 táng turin hrem

Hmeichhe naupang pawngsualtu Khumlal­muana s/o V Lalchhunga, Mimbung chu Chmphai District Court-a special judge R Vanlalena chuan kum 17 chhung jail-a táng tur leh Rs. 7,000 chawi turin a hrem.

Hemi chungchanga FIR thehluttu tarlan danin, Khumlamuana hian hmei­chhe naupang kum 10 vel mi chu a sikul báng zui hawin, a nu leh pate awm loh laiin hmeichhiat mipatna a hmanpui a; a hnu­ah hmeichhe naupang chu ramhnuaiah hruaiin, vawi khat a pawngsual leh bawk.

Ngopa police-te chuan he thubuai hi chhui nghalin, Khumlalmuana chu August 3, 2016-ah an man a, jail-ah dah a ni. Khumlalmuana hian kumtlinglo nia inchhálin a birth certificate pawh a siam danglam hman a, chuvang chuan bail-a chhuah a ni. Economic and Statistic department aṭanga Khumlalmuana pian ní leh thla dik tak an lo hrilh hnu chuan Khumlalmuana chuan a birth certificate chu a tidanglam ngei tih hriat chhuah a ni.

Khumlalmuana chuan piangsual a nih tih lantirna certifcate (disability certifcate) a la leh a, Court chu chhuah zalen turin a dil. Mahse, disability certifcate chu thil sual tih nacháng hriat loh phahtirtu a nia Court-in a hriat loh avangin pawmsak a ni lo.

Special Judge chuan, police-te thil hmuh chhuah leh thuretute thusawi a zirchian hnuah Khum­lalmuana chu kum 17 chhung jail-a táng tur leh Rs. 7,000 chawi turin a hrem a; Special Judge chuan, pawngsual tuar nau­pang chu dan ang taka zang­nadawmna a hmuh theihna turin order a siam nghal bawk.