Nghet takin kan ding tur a ni - Liandinga

ZPM star campaigner PL Liandinga chuan, ZPM chu an manifesto anga kal tum an ni tih sawiin, "Kan dinna hi a dik a, a dik tih kan chian tawh chuan hnung tawlh tur kan ni lo a, kan dinna ngaiah nghet takin kan ding tlat tur a ni," a ti.

PL Liandinga hian Ningani zan khan Khatla South-a vantlang inkhawmah thu sawiin, "Mizoramah thil chiang leh chiang lo a awm a, chungte chu - ZPM hi kan ṭha ngei ang a, kan fel ngei ang tih kan chiang ngam lo a ni mai thei, mahse, kan sorkar hrawn tawh pahnihte hi chu an ṭha lo ngei tih thuah kan chiang thung," a ti a; ṭha lo tih hriat chian sa pahnih hnâwl a ngai a, ṭha lo tih hriat tawh na nâ nâ thlan nawn leh chu mipuiin an ba lo tih a sawi.

Sem policy chu eng ram mahin an la din chhuahpui ngai lo tih sawiin Lian­dinga chuan, "ZPM chuan ṭha a ti ve thei lo. Inthlan hmaa thil sem pawh ṭha kan ti lo a, inthlan hnua sem pawh ṭha kan ti lo. NLUP hlawhtlinpuitu zawngin Aizawl leh thingtlangah ka vâk vel a, khawiahmah ka hmu lo. Hlawhtlinpui teuh ber berte chu a hlawhtling sa, NLUP tel hauh loa lei rem raptute an ni," a ti.

PL Liandinga chuan, "Tun ṭuma kan inthlanna hi tisa leh thlarau lam indona a ni a, Hindu leh Kristiante kan indo a ni. Hindu páwl vulh len hnial lo leh Kristian pawl vawn tlat duhtute kan inbei a ni," a ti a; ngaihtuahna fím hmanga vote thlak turin mipui a ngen.

Aizawl West III biala ZPM candidate Zai­thanzama pawhin thu sawiin, ZPM sorkarna an chan chuan tuialhthei, gas, kawlphetha leh mipui ni tin mamawh dangte an ngai pawimawh dawn tih a sawi a, "Gas bûk tling tak chauh leh petrol fîr ṭha ngei mipuiin an hmuh theih nan ka theihna zawng zawng ka sêng dawn a ni," a ti.

ZPM Ṭhalai chairman Malsawmzuala chuan, ZPM a pian tirah an kal dan uluk takin a thlir a, ZPM chu kohhran leh a ṭhalai pawla rawngbawltute tan tel ngeina chi nia a hriat avangin a tel ve tih sawiin, "Huaisen takin ram siamṭhat hna thawk turin ka pên chhuak ve ta a ni," tiin a sawi.