INC hi 'Awle mittui tla ang' an ni - ZPM

Zoram Peoples' Movement (ZPM) chuan thu­chhuah siamin, Congress party-in zu zawrh chung­changah kohhran râwn zel an tum thu an tarlan chu 'Awle mittui tla ang' chauh a nih thu an tarlang.

ZPM chuan, MPCC Media department-in November 22, 2018-a media hmaah 'Zu chungchanga nasa taka ṭawngṭaitu kohhrante hi zu zawrh chungchangah kan ráwn zel dawn tih kan puang a ni," tia an sawi chu mipui laka lemchanna leh vote zawnna tenawm taka an ngaih thu an sawi a, "Congress party chêt dan hi 'Awle mittui tla ang' lekah kan ngai," an ti.

August 16, 2018 (Zirtawpni)-a Congress Bhavan-a political session-ah Congress president leh chief minister Lal Thanhawla'n, 'MLPC Act hman a nihin kohhranin ṭawngṭai rualna nen hun hmang mah se, ṭawngṭaina chhanna chu awmze nei deuh­a zu zawrh hi niin a lang,' tiin a sawi thu sawiin ZPM chuan, "Pu Lal Thanhawla ṭawngkam hi Mizoramah zu zawrh a nih loh nana ṭhahnemngai taka Pathian autu kohhran hote ṭawngṭaina deusawhna dik tak a ni," an ti.

ZPM chuan, March 16, 2015-a Mizoram zu zawrh ṭan a nih dawnah kohhran mipui leh kohhran ṭhalaite leh mipuiin poster-te an târ tih sawiin, "Zu zawrh dodala kan punkhawm kha kan la theihnghilh lo. Khati khawpa dodalna a nasa chunga zu an zawrh luih vanga mi tam takin nunna an chân leh hmeithai tam tak an awm ta pawi kan ti tak zet," an ti a; kohhran mite tan Congress party chu vote tlak an ni tawh lo niin an sawi.

Assembly House-ah Congress minister John Rotluangliana leh MLA Lalrinthanga ten zu zawrh sawi mawiin, zu leh kohhran leh pastor-te mawi lo taka an sawi zawm thu te, MPCC Media department-in zu zawrh dotu pastor leh kohhran upate hming Congress Media department-ah theh­lut tura ngenna Congress Thlifim chanchinbuah an chhuah thute ZPM chuan an tarlang bawk.