Parliament-a Kristiante tana au chhuak ngam awmchhun kan ni - NPP President

National Peoples' Party (NPP) chuan nimin khan Serchhipah vantlang inkhawm an buatsaih a; NPP president Conrad Sangma, Meghalaya chief minister chuan thu sawiin, NPP dintu PA Sangma (L) leh amah chu Parliament-a hmarchhak Kristiante tana au ṭhin awmchhun an nih thu a sawi.

Conrad Sangma chuan, India ram politics a inthlak mek tih sawiin, "Congress pawh state 18 aṭangin state hnihah chauh sorkar an siam tawh.

Hmarchhakah phei chuan Mizoramah chiah sorkarna an siam tawh. NPP hi party naupang tê mah ni se, state palia sorkarna siamtute zingah kan tel a, tun hi Mizoram political change atan hun ṭha a ni," a ti.

Meghalaya CM chuan, sorkarna an siam aṭanga thla riat chhungin sport lamah an state-in nasa taka hma a sawn thu sawiin, "Entrepreneurship lamah pawh danglamna thlenin, MLA fund aṭangin ṭhalai 100 chuang IAS coaching kaltir an ni," a ti a; Serchhip mipuite chu Mizorama hmasawnna thlentu an nih theihna atan NPP candidate vote turin a sáwm.

Serchhipa NPP candidate Kapliana Pachuau pawhin thu sawiin, "Serchhip bialin MLA eng emaw zat kan nei tawh a, chungte chu kawng chhia emaw, supply lama harsatna hrang hrang kan neih pawhin ngam taka kan harsatnate thlen ngamna kan nei ngai lo a, MLA nei lo ang mai kan ni. Chhim lamin min harh khalh a, anni chuan an bial chhnga mi ngei MLA neiin nasa takin hma an sawn a ni," a ti.