Ruihtheihthil chungchangah Inrâwn khawmna buatsaih

Social Welfare department chuan nimin khan Hotel Floria-ah Mizorama ruih theih thil leh a kaihhnawih lama mithiamte inrâwnkhawmna, 'Consultation Workshop for Experts on Drug Prevention Services in Mizoram' an buatsaih a, vawiinah chhunzawm a ni ang.

Workshop hawngtu Social Welfare secretary K Vanlalrawni chuan, Mizorama ṭhalai tam tak tibuaitu ruihhlo chungchanga inrâwn khawmna hun buatsaih a ni chu a lawmawm a tih a sawi a, "Zirchiannaah chuan, ṭhalaite hi ruih theih thilin an inchiu nghal mai lo a, vaihlo, zu leh ganja aṭangin drugs hlauh­awm lehzualah an ṭuan ṭhin a ni," a ti.

K Vanlalrawni chuan, National HIV Programme aṭangin drugs hmanga inchiu zat hriat theih mah se, an drugs hman ber leh an hman dan hriat a har tih sawiin, "Workshop hian hemi kawngah hian min puih ngei kan beisei a ni," a ti a; workshop neih a nih hnuah master trainers training neih a ni leh dawn a, chungte chuan district hrang hranga worker-te training an pek leh dawn thu a sawi.

Workshop-ah hian ruihhlo vanga Mizoramin harsatna kan neihte sawiho a ni a, ruihhlo dona kawnga inkaihhruaina Module-Mizoram Addiction Prevention Programme (MAPP) duanchhuah niin, hemi hmang hian training of trainers pawh buatsaih a ni dawn a ni.