MLA fund hmang dik loah Sangṭhuama puh

Congress party thupuangtu Lal­lianchhunga, MPCC Media chairman ni bawk chuan nimin khan Aizawl Press Club-ah thuthar thehdarhtute a kâwm a; Aizawl West-I bialtu MLA leh tun inthlana MNF candidate K Sangṭhuama’n a MLA fund dik lo takin a hmang ṭhin niin a sawi.

Lallianchhunga chuan, K Sang­ṭhuama'n MLA fund a hman dante chu RTI Act hmangin October 17, 2018-ah an dil chhuah thu sawiin, "A bial chhung­a MLA fund a hmanna hrang hrangte kan thlirin a lungchhiatthlak a, Aizawl West-I bial mipui hmuhsitna piah lamah, MLA fund hmanga mahni leh party enkawl a tum hi a mak kan ti a, he bial tan hian MLA ni tlakah kan ngai lo," a ti.

MPCC thupuangtu sawi danin, kum 2018-19 chhunga MLA fund a hmanah, Sairang GSA chu khelmual thar laih hna a pe a, Rs. 5,00,000 pek turah Rs. 1,00,000 chu ama'n a la lêt ang a, Rs. 4,00,000-a thawk turin an inrem a, hna an inpe a ni. RTI Act hmanga an dil chhuahah erawh chuan, Rs. 20,00,000 hman angin a inziak a, Sairang GSA-in Rs. 4,00,000 chauh an dawn si avangin, Rs. 16,00,000 a bo ta a ni. July 21, 2018 zing dar 8:57-ah Liandinga, Aizawl West-I MNF Block treasurer inah Liandinga'n Rs. 4,00,000 chu Sairang GSA Sairang hruaitute a hlan niin a sawi.

K Sangṭhuama MLA fund aṭangin Tuivamit Tennis Club hmingin hna hrang hrang atan Rs. 11,00,000 hmang ral angin RTI zawhna chhannaah ziah a ni a; chu'ng sumte chu seal lem siamchawp hmanga lak chhuah ṭhin a nia sawiin Lallianchhunga chuan, "Pawisate hi NREGS hmanga Tuivamit mipuiin kawng an laih vek tawh chu thawk ang­in an tarlang a, AICS transformer bula retaining wall pawh lung rem sa vek tawh thawk angin an insawi a ni," a ti.

Lallianchhunga chuan, MLA K Sangṭhuama chuan a MLA fund a hmannaah pawl hming phuahchawp leh hnathawh hmuh tur awm lo a tam hle nia sawiin, "MLA fund a pek aṭang hian a chanve (50%)-te pawisa faiin a la let fo ṭhin," an ti a; a MLA fund hmanna anga ziah aṭanga a taka hnathawh hmuh tur awm lo leh pawisa lak let an hriat theih chin chu Rs. 39,74,600 a nih thu a sawi.

Congress Thupuangtu chuan MNF Legal Board-in Lokayukta atana sorkar­in kum thum chhunga sum a dah cheng nuai 478.02 awmna an zawh chu a chhang a, Lokayukta tana Mizoram sorkarin kum 2016-17 leh kum 2017-18 atana cheng nuai 159.34 ve ve a dah chu hman a nih loh avangin kum tawpah ‘surrender’ a nih thu a sawi. Kum 2018-19 atana nuai 159.34 dah leh chu Lokayukta office atana Bungkawn Tuikhur Venga Judy Zohmingliani in luah man te, furniture leh ṭul dang atante eng emaw zat hman tawh a nih thu a sawi a ni.

Lallianchhunga chuan, Law & Judicial department-a mi pakhatin cheng nuai 143, amah leh a chhungte account-ah a dah tih hriat chhuah a nih avangin sum tihchingpennaa mawhphurtu bera hriat Bill Assistant chu bân nghal a nih thu leh, special audit neih a nih hnuah ACB-ah FIR thehluh nghal a nih thu a sawi bawk.