Sorkarin cyber crime a ngai pawimawh - Home Minister
National Institute of Electronics & Information Communication (NIELIT), Zuangtui chuan Mizoram police hnuaia thawk mi 38 tan nimin khan ni thum awh tur training an buatsaih ṭan. Training hawngtu Home minister Lalchamliana chuan, sorkarin cyber crime a ngaih pawimawh thu a sawi.
Home Minister chuan, information technology ṭhang chakin cyber crime a keng tel tih sawiin, "He lama thiamna a san ang zelin cyber crime pawh a pung chak. CID (Crime) lamin an record danin, kum 2021 khan Mizoram bikah cyber crime case 470 vel ziah luh a ni a, chu'ng zinga 70% vel chu pawisa lam kaihhnawih a ni," a ti.
Cyber crime chu thiamna bik nei lo tan chuan tih vak ngaihna a vàn thu sawiin Lalchamliana chuan, "Kan dona hmanrua hmasa ber tur hemi kawng thiamna kan neih leh thiamna tihpun a ni," a ti a; NIELIT-in police leh law enforcing agency-te mamawh tak mai pakhat digital forensics leh cyber crime lama training-te pea hma an lâkpui chu lawmawm a tih thu a sawi.
Home Minister chuan, cyber crime a ngaih pawimawh thu sawiin, "Mizoram police, forensic science laboratory, digital forensics leh cyber crime lam beih lêtna kawngah sorkar a inbuatsaih nasa hle," a ti.
ICFAI University vice chancellor Prof. PR Vandhera pawhin thu sawiin, police tan sualna chi hrang hrang chhui chhuahna kawnga an thiamna tihpun nan training a pawimawh dan a sawifiah.
Sorkar thuchhuah tarlan danin, Ministry of Home Affairs chuan Indian Cyber Crime Coordination Center (I4C) a din a, Awareness Day/Cyber Jagrookta Diwas thla tin Nilaini hmasa berah hman ṭhin tura tih a ni. Mizoramah pawh hman mek a ni a, mipui náwlpuiin an en tur TV programme te, college leh sikul lamah pawl hrang hrangte'n an hriatthiam tâwk tur anga zirtir turtein ruahmanna siam a ni.